गिरिजानन्द साह/जनकपुरधाम/असार ३ गते। समाजमा जवाफदेही शासन प्रणालीको प्रवर्द्धन तथा महिलाहरू र युवाहरूको प्रभावकारी सहभागिता सुनिश्चित गर्ने उद्देश्यका साथ ‘लोकतान्त्रिक जवाफदेहितामा युवा र महिलाको भूमिका’ विषयक अन्तरक्रिया कार्यक्रम जनकपुरधाममा सम्पन्न भएको छ।
कायापलट संस्थाको कचहरी अभियान अन्तर्गत आयोजित उक्त कार्यक्रम WHRD धनुषाको सहकार्यमा, इन्टरनेशनल अलर्ट र युरोपियन युनियनको आर्थिक तथा प्राविधिक सहयोगमा सम्पन्न भएको हो।
कार्यक्रममा प्रमुख वक्ताका रूपमा सामाजिक अभियन्ता सम्झना बर्माले लोकतान्त्रिक प्रणालीमा महिलाको सहभागिता आवश्यक मात्र नभई अपरिहार्य भएको उल्लेख गर्दै भनिन्, “महिला र युवा जनशक्तिलाई लोकतान्त्रिक प्रक्रियामा समावेश नगरी जवाफदेही शासनको निर्माण असम्भवजस्तै हुन्छ।”
कायापलट संस्थाका संस्थापक अध्यक्ष दिवाकर उप्रेतीले युवाहरूको सकृय सहभागिता बिना लोकतन्त्र सशक्त नहुने उल्लेख गर्दै जनतासँग प्रत्यक्ष सरोकार राख्ने मुद्दाहरूमा सचेत र सक्रिय हुन सबै युवालाई आग्रह गरे।
कार्यक्रममा कायापलटका कोषाध्यक्ष बलराम शाह, महिला मानव अधिकार रक्षक सञ्जालकी केन्द्रिय सदस्य रेखा झा, सामाजिक अभियन्ता जमुना भुजेल, नेपाल पत्रकार महासंघ धनुषाका कोषाध्यक्ष तथा सञ्चारकर्मी गोविन्द महतो, विभिन्न नागरिक समाजका प्रतिनिधिहरू तथा युवाहरूको उल्लेखनीय उपस्थिति रहेको थियो।
वक्ताहरूले लोकतन्त्रमा जवाफदेहिताको महत्व, महिलाको नेतृत्व विकास, युवाको भूमिकाबारे धारणा राख्दै यस्तो खालको बहसले स्थानीय तहमा राजनीतिक र सामाजिक चेतना अभिवृद्धिमा सहयोग पुर्याउने विश्वास व्यक्त गरे।
कार्यक्रम अन्तरक्रियामूलक भएको र सहभागीहरूबीच लोकतान्त्रिक मूल्य, उत्तरदायित्व, महिला सशक्तीकरण, र युवा नेतृत्वका विविध पक्षहरूमा विचार आदानप्रदान भएको आयोजक संस्थाले जनाएको छ।
कायापलट संस्थाले सञ्चालन गर्दै आएको ‘कचहरी अभियान’ अन्तर्गत यसअघि पनि स्थानीय तहमा विविध सामाजिक, राजनीतिक र लैङ्गिक मुद्दामा जनसंवाद र चेतनामूलक कार्यक्रमहरू गर्दै आएको छ।
Discussion about this post