धनुषा/जेठ २२ गते। ट्राफिक प्रहरी धनुषाद्वारा सडक अनुशासन कायम गर्दै सवारी दुर्घटनामा कमी ल्याउने उद्देश्यले ‘ट्राफिक सप्ताह २०८२’ कार्यक्रम सुरु गरिएको छ। कार्यक्रमको उद्घाटन मधेश प्रदेशका मुख्यमन्त्री सतिश कुमार सिंहले जनकपुरधाममा एक विशेष समारोहबीच गरेका हुन्।
यस कार्यक्रमको आयोजना मधेश प्रदेश सरकारअन्तर्गत गृह, सञ्चार तथा कानून मन्त्रालय तथा जिल्ला ट्राफिक प्रहरी कार्यालय धनुषाले संयुक्त रूपमा गरेका हुन्। साथै, मधेश प्रदेश प्रहरी कार्यालय जनकपुरधाम र जिल्ला प्रहरी कार्यालय धनुषाको सक्रिय समन्वयमा कार्यक्रम सञ्चालन भएको हो।
उद्घाटन कार्यक्रममा गृह, सञ्चार तथा कानून मन्त्री रमेश लेखी तथा मधेश प्रदेश प्रहरी प्रमुख डिआइजी उमा प्रसाद चतुर्वेदी विशिष्ट अतिथिको रूपमा उपस्थित थिए।
जिल्ला ट्राफिक प्रहरी कार्यालय धनुषाका प्रमुख सूर्य बहादुर शाहीका अनुसार सडक सुरक्षाप्रति सर्वसाधारणमा जनचेतना फैलाउने उद्देश्यले यो सप्ताह आयोजना गरिएको बताए ।
कार्यक्रम अन्तर्गत ट्राफिक नियमका बारेमा जनचेतनामूलक र्याली, सडक प्लेकार्ड प्रदर्शन, गाडीहरुमा स्टिकर टास्ने,विद्यालयस्तरीय सचेतना कार्यक्रम तथा चालकहरूका लागि विशेष अभिमुखीकरण लगायतका गतिविधिहरू सञ्चालन गरिनेछ।
यस सप्ताहव्यापी अभियानमार्फत नागरिकमा ट्राफिक नियमको महत्व बुझाउन र दुर्घटना न्यूनीकरणमा सहयोग पुग्ने विश्वास गरिएको छ।
Discussion about this post