रोट्रयाक्ट क्लव अफ जनकपुरधामको औपचारिक शुभारम्भ, आयुष कर्ण अध्यक्षमा चयन

गिरिजानन्द साह/जनकपुरधाम/वैशाख १९ गते। रोटरी क्लब अफ जनकपुरधामको स्पोन्सरमा रोट्रयाक्ट क्लव अफ जनकपुरधामको औपचारिक शुभारम्भ गरिएको छ। क्लबको अध्यक्षमा आयुष कर्ण चयन भएका छन् ।

जनकपुरधाममा आयोजित एक विशेष समारोहबीच क्लबको औपचारिक उद्घाटन गरिएको हो। सो अवसरमा रोटरी क्लब अफ जनकपुरधामका अध्यक्ष प्रमोद अग्रवालले रोटरी इन्टरनेशनलको उद्देश्य हासिल गर्न युथ टीमको आवश्यकता रहेको उल्लेख गर्दै नव गठित क्लवलाई आवश्यक सहयोग प्रदान गर्ने प्रतिबद्धता जनाए।क्लबका अध्यक्ष आयुष कर्णले जनकपुरधाममा समुदायको सेवामा समर्पित प्रेरणादायी क्लब निर्माण गर्ने लक्ष्य प्रस्तुत गरे। उनले आगामी वर्ष २०२५-२०२६ का लागि क्लबको अध्यक्षमा विकास साह रहने जानकारी पनि दिएका छन्।

कार्यक्रममा अतिथिहरु रोट्रयाक्ट क्लब अफ चन्द्रगिरी तथा जोनका प्रतिनिधिहरू, रोटरी क्लब अफ जनकपुरधामका अध्यक्ष प्रमोद अग्रवाल, पूर्व अध्यक्षहरू चन्द्रशेखर अग्रवाल, निर्मल चौधरी र विजय झुनझुनवाला लगायत रोट्रयाक्ट क्लव जनकपुरधामका बोर्डका पदाधिकारीहरु र सदस्यहरूको उपस्थिति रहेको थियो।

समारोहमा सदस्यहरूलाई प्रमाणपत्र वितरण गरिएको थियो भने अतिथिहरुलाई मायाको चिनो प्रदान गरी सम्मान गरिएको थियो। कार्यक्रमको सञ्चालन क्लबकी सचिव सालु कर्णले गरेकी थिइन्।