सप्तरीमा बस दुर्घटना दुई जनाको घटनास्थलमै मृत्यु,आधा दर्जनबढी घाइते

सप्तरी/बैशाख १४ गते। सप्तरी जिल्लाको कञ्चनरुप नगरपालिका–१०, बदगामामा आइतबार मध्यान्ह एक यात्रु बस दुर्घटना हुँदा दुई जनाको मृत्यु भएको छ भने आधा दर्जन यात्रु घाइते भएका छन्।

उदयपुरबाट विराटनगरतर्फ जाँदै गरेको यात्रुबाहक बस (प्र १–०१–००१ ख ३४२०) अनियन्त्रित भई पल्टिँदा दुर्घटना भएको जिल्ला प्रहरी कार्यालय सप्तरीले जनाएको छ। दुर्घटनामा नाम, थर र वतन खुल्न नसकेका एक पुरुष र एक महिलाको घटनास्थलमै मृत्यु भएको सप्तरीका प्रहरी प्रमुख एसपी ढकेन्द्र खतिवडाले जानकारी दिए। मृतकको सनाखत प्रक्रिया भइरहेको छ भने दुबै शवलाई गजेन्द्र नारायण सिंह अस्पताल, राजविराजमा ल्याइएको प्रहरीले जनाएको छ।

दुर्घटनामा घाइते हुनेमा सप्तरीको सप्तकोशी नगरपालिका–१ की २१ वर्षीया सुबेता दाहाल, २६ वर्षीया चेतना भट्टाई, झापाको क्षेत्र नम्बर ३ निवासी मनोज भट्टराई र मिना भट्टराई, उदयपुर चौडण्डीगढी नगरपालिका–५ निवासी ५९ वर्षीया कमला भुसाल तथा हालसम्म नाम थर नखुलेका ७५ वर्षीय एक पुरुष रहेका छन्। घाइतेहरूलाई तत्कालै उद्धार गरी कञ्चनरुप नगरपालिका–१२ स्थित धर्मेश्वर अस्पतालमा उपचार भइरहेको प्रहरीले जनाएको छ।

दुर्घटनास्थलमा इलाका प्रहरी कार्यालय कंचनपुरका डिएसपी माधव प्रसाद काफ्लेको नेतृत्वमा प्रहरी टोली खटिएको थियो । साथै, बस चालक भने फरार रहेको र उनको खोजी कार्य जारी रहेको जिल्ला प्रहरी कार्यालय सप्तरीले जनाएको छ।