सशस्त्र प्रहरी बल, नेपाल नं. ८ गण हे. क्वा. धनुषाको १८औं स्थापना दिवस समारोह भव्य रूपमा सम्पन्न

गिरिजानन्द साह/जनकपुरधाम/बैशाख ११ गते। सशस्त्र प्रहरी बल, नेपाल नं. ८ गण हे. क्वा. मुजेलिया, धनुषाको १८औं स्थापना दिवस २०८२ सालको विशेष समारोहका साथ सम्पन्न भएको छ। गणको स्थापना दिवसको अवसरमा आयोजित कार्यक्रम सशस्त्र प्रहरी बल ८ नं. गणका गणपति एसपी निर्मल खड्काको अध्यक्षतामा सम्पन्न भएको हो।

उक्त कार्यक्रमको प्रमुख आतिथ्य सशस्त्र प्रहरी बल मधेस प्रदेशका प्रमुख, डीआइजी कालीदास धबौजीलगायत विशिष्ट अतिथिको रूपमा प्रमुख जिल्ला अधिकारी रामुराज कडरिया रहनु भएको थियो। कार्यक्रमलाई औपचारिक र गरिमामय बनाउन विभिन्न सुरक्षा निकायका प्रतिनिधिहरू, स्थानीय प्रशासनका पदाधिकारीहरू, जनप्रतिनिधिहरू, पत्रकारहरू तथा समुदायका अगुवा व्यक्तिहरूको उल्लेखनीय उपस्थिति रहेको थियो।

समारोहमा सशस्त्र प्रहरी बलको विगत १८ वर्षको यात्रा, सुरक्षात्मक योगदान, विपद् व्यवस्थापनमा निभाएको भूमिका र स्थानीयस्तरमा समन्वयका प्रयासहरूबारे प्रकाश पारिएको थियो।

प्रमुख अतिथि डीआइजी धबौजीले सशस्त्र प्रहरी बलले राज्यको सुरक्षा प्रणालीमा निर्वाह गरेको भूमिकालाई प्रशंसायोग्य ठहर गर्दै भविष्यमा अझ प्रविधिमैत्री, उत्तरदायी र जनमैत्री सेवाका लागि तत्पर रहन निर्देशन दिनुभयो। विशिष्ट अतिथि प्रमुख जिल्ला अधिकारी कडरियाले नागरिक सुरक्षामा सशस्त्र प्रहरीको योगदानप्रति कृतज्ञता व्यक्त गर्दै स्थानीय प्रशासनसँगको सहकार्यलाई अझ मजबुत पार्नुपर्नेमा जोड दिनुभयो।

कार्यक्रममा उत्कृष्ट कार्यसम्पादन गर्ने प्रहरी कर्मचारीहरूलाई सम्मान तथा पुरस्कृत गरिएको थियो। साथै, सामुदायिक सहभागिता अभिवृद्धिका लागि विभिन्न जनचेतनामूलक कार्यक्रमहरूको जानकारी समेत प्रस्तुत गरिएको थियो।

समारोह अन्त्यमा सबै अतिथिहरू र सहभागीहरूलाई धन्यवाद ज्ञापन गर्दै, राष्ट्र र जनताको सेवामा समर्पित भएर कार्य गर्ने सशस्त्र प्रहरी बलको प्रतिबद्धता पुनः दोहोर्याइएको थियो।