जनकपुरधाममा बंगलादेशी हिन्दू नेता भावेशचन्द्र रायको हत्या विरुद्ध विरोध प्रदर्शन

गिरिजानन्द साह/जनकपुरधाम/वैशाख ९ गते। बंगलादेशमा हिन्दू नेता भावेशचन्द्र रायको हत्या विरुद्ध जनकपुरधाममा विरोध प्रदर्शन गरिएको छ। विश्व हिन्दू परिषद् नेपालको आयोजनामा भएको प्रदर्शनमा सहभागीहरूले इस्लामिक उग्रवादको विरोध गर्दै हिन्दू अल्पसंख्यकको सुरक्षाका लागि अन्तर्राष्ट्रिय समुदायको ध्यानाकर्षण गराए।

विरोध कार्यक्रममा बोल्ने वक्ताहरूले बंगलादेशमा बढ्दो धार्मिक हिंसा र हिन्दू समुदायमाथिको आक्रमणप्रति गहिरो चिन्ता व्यक्त गर्दै अन्तर्राष्ट्रिय मानव अधिकार संस्थाहरूलाई तत्काल कदम चाल्न आग्रह गरे।

प्रदर्शनकारीहरूले ‘हिन्दूमाथि अत्याचार बन्द गर’, ‘बंगलादेशका हिन्दूको रक्षाको लागि नेपाल सरकारले पहल गरोस्’, ‘हिन्दू धर्मको रक्षा गर’ लगायतका नारा लेखिएका प्लेकार्ड बोकेका थिए।

कार्यक्रममा बोल्दै परिषद्का स्थानीय अगुवा सन्तोष साहले बंगलादेशमा पटक–पटक हिन्दूहरूमाथि आक्रमण भइरहे पनि अन्तर्राष्ट्रिय समुदाय मौन रहेकोप्रति चिन्ता व्यक्त गरे। उनीहरूले नेपालको सरकार तथा नागरिक समाजले समेत बंगलादेशी हिन्दूहरूप्रति ऐक्यबद्धता जनाउनुपर्ने आवश्यकता रहेकोमा जोड दिए । प्रदर्शन जनकपुरधामको जनक चोकमा गरिएको थियो।