गिरिजानन्द साह/जनकपुरधाम/वैशाख ७ गते। जानकी नवमीलाई राष्ट्रिय पर्वको रूपमा घोषणा गर्दै सार्वजनिक विदा दिन जनकपुरधामस्थित रामानन्दीय वैष्णव संघले माग गरेको छ।
जानकी मन्दिरका उत्तराधिकारी महन्थ रामरोशन दासको अगुवाइमा रामानन्दीय वैष्णव संघले जनकपुरधामको तुलसी स्मारकमा भएको पत्रकार सम्मेलनमा जानकी माता नेपालको छोरी भएको स्मरण गराउँदै महन्थ दासले अहिलेसम्म संघीय सरकारले जानकी नवमीलाई राष्ट्रिय पर्वको मान्यता नदिएकोप्रति गम्भीर दुःख व्यक्त गरे।
उनले यस वर्ष पनि वैशाख २३ गते जनकपुरधामका विभिन्न मन्दिरहरूमा जानकी नवमी विशेष श्रद्धा र भव्यताका साथ मनाइने जानकारी दिए । उनले थप गर्दै भने, “जानकी नवमीको अवसरमा दिप प्रज्वलनसहित भव्य सांस्कृतिक तथा धार्मिक कार्यक्रमको आयोजना गरिनेछ, जसमा देशभरका श्रद्धालु भक्तजनहरूको सहभागिता रहनेछ ।” कार्यक्रमअन्तर्गत झाँकी प्रदर्शन, भजनकीर्तन, प्रवचन तथा सांस्कृतिक प्रस्तुतीहरू समेत समावेश गरिनेछ ।
साथै संघका अध्यक्ष तथा जानकी मन्दिरका सहायक महन्थ रामरोसन दासले सो दिन बिदाको माग गर्दै धनुषाका प्रमुख जिल्ला अधिकारी रामुराज कडरियालाई ज्ञापनपत्र समेत बुझाएका छन् । जनकपुरधामवासीहरूले समेत जानकी नवमीलाई नेपालकै गौरवको पर्व मानेर संघ सरकारले राष्ट्रिय विदा दिनुपर्नेमा जोड दिएका छन् ।
यस वर्ष ९ दिनसम्म जानकी नवमी मनाइने साधु समाजको तयारी छ । पहिलो दिन दूधमती नदीमा शाही स्नान गरी रामायण पाठ र रामकथा सबै दिन गरिने महन्थ दासले जानकारी दिए ।
उनका अनुसार रामकथामा राम र सीताका बारेमा धार्मिक गुरुले चर्चा गर्नेछन् । मुख्य दिन जन्म आरती, सन्ध्या आरती र दीप प्रज्वलन गर्ने तालिका छ । जानकी नवमीको अवसरमा मठ मन्दिरले गोष्ठी पनि आयोजना गरी जानकी नवमी मनाउने तयारीमा छ ।
Discussion about this post