गिरिजानन्द साह/जनकपुरधाम/चैत २९ गते। जनकपुरधाममा सञ्चालन भइरहेको “प्लास्टिक मुक्त भोलि (Plastic Free Tomorrow)” अभियान अन्तर्गत वडा संवाद तथा समापन समारोह कार्यक्रम भव्य रुपमा सम्पन्न भएको छ। कार्यक्रम जनकपुर जेसिजको सभाहलमा आयोजना गरिएको थियो, जहाँ अभियानका संयोजक विकास साहको अध्यक्षतामा समापन कार्यक्रम सम्पन्न भएको छ ।
कार्यक्रममा संयोजक साहले अभियानले हालसम्म गरेका गतिविधिहरू, प्राप्त उपलब्धिहरू, र सो क्रममा लागेको खर्चको विस्तृत विवरण प्रस्तुत गरे। उनले अभियान सफल बनाउनका लागि विभिन्न संघसंस्थाहरू, स्थानीय निकायहरू तथा स्वयंसेवकहरूको महत्त्वपूर्ण योगदानलाई विशेष रूपमा उल्लेख गरे।
कार्यक्रमको विशेष आकर्षणको रूपमा प्लास्टिकको जानकारी समेटीएको जनचेतना मुलक सडक नाटक प्रस्तुत गरिएको थियो र अभियानमा सक्रिय रुपमा सहयोग पुर्याउने विभिन्न संघसंस्थाहरूलाई सम्मान पत्र तथा धन्यवाद प्रदान गरिएको थियो। सम्मानित हुनेहरूमध्ये जनकपुरधाम उपमहानगरपालिकाका प्रतिनिधिहरू, वडा नम्बर १ देखि २५ सम्मका वडा प्रतिनिधिहरू, युवा संगठनका प्रतिनिधिहरू, सजिलो पोस्ट मिडिया, NYAC, मिथिला वाइल्ड लाइफ ट्रस्ट, नेपाल डेभलपमेन्ट सोसाइटीका प्रतिनिधिहरू, र स्वयं प्लास्टिक मुक्त भोलि अभियानमा संलग्न कार्यकर्ता तथा सरोकारवाला व्यक्तिहरू प्रमुख थिए।
कार्यक्रममा वक्ताहरुले प्लास्टिक प्रयोग घटाउन र वातावरणमैत्री समाज निर्माण गर्न सबै नागरिकलाई एकजुट भई अभियानमा सहभागी हुन पर्ने बताए। साथै , “प्लास्टिक प्रदूषणले हाम्रो स्वास्थ्य र वातावरणमा गम्भीर असर पारिरहेकोले यस अभियानको उद्देश्य जनचेतना अभिवृद्धि गर्दै व्यवहारिक परिवर्तन ल्याउने बताए ।”
कार्यक्रमको अन्त्यमा सहभागी सबैलाई प्लास्टिक मुक्त समाज निर्माणमा निरन्तर सहयोग र सक्रियता जारी राख्न आह्वान गरिएको थियो।
Discussion about this post