विगत एक हप्ताभन्दा बढी समयदेखि बन्द रहेका जनकपुरधामका शैक्षिक संस्थाहरू आज देखि सञ्चालनमा

मङ्सिर ११ गते। विगत एक हप्ताभन्दा बढी समयदेखि बन्द रहेका जनकपुरधामका शैक्षिक संस्थाहरू आज मंगलबारदेखि सञ्चालनमा ल्याएका छन । जनकपुरधाम उद्योग वाणिज्य संघको पहलमा सोमबार बसेको वृहत् बैठकले मंगलबारदेखि विद्यालय सञ्चालन गर्ने सहमति गरेका थिए ।

संघका सचिव नरेन्द्र बिक्रम साहका अनुसार छात्रवृत्तिको विषयलाई समाधान गर्न एक महिनाभित्र समिति गठन गर्ने निर्णय भएको बताए ।सचिव साहले जनकपुरधाम उपमहानगरपालिकाको शिक्षा सम्बन्धी कार्यविधि बनाउन ७ वा ९ सदस्यीय समिति गठन गरिने र ३० दिनभित्र कार्यविधि निर्माण गरिने सहमति भएको बताए। समितिमा नीजि विद्यालयका संगठन, विद्यार्थी संगठन, जनकपुरधाम उपमहानगरपालिका, र नागरिक समाजका प्रतिनिधिहरू रहनेछन्।

जनकपुरधाम उद्योग वाणिज्य संघको पहलमा भएको सर्वपक्षिय बैठकमा समस्या समाधानका लागि जनकपुरधाम उपमहानगरपालिकाले ३० दिनको समय निर्धारण गरेको छ । सोमबार भएको बैठकमा जनकपुरधाम उपमहानगरपालिकाका प्रतिनिधि, नेविसंघ, अनेरास्ववियू, हिसान, प्याबसन, एनप्याबसन, व्यापारी र नागरिक समाजका प्रतिनिधिहरुको सहभागिता रहेको थियो ।

जनकपुरधाम उपमहानगरपालिकाका निमित कार्यकारी अधिकृत धीरेन्द्रलाल कर्णले ३० दिन भित्र छात्रावृत्तिलगायतका समस्याहरु समाधान हुने बताए । एक महिना भित्रै शिक्षामा देखिएका सबै सुधारका लागि कार्यविधि बनाइने समेत निर्णय भएको उनले बताए । नीजि विद्यालयका संगठन हिसान, एनप्याब्सन, प्याब्सन, एमप्याब्सन, र नेपाल प्याब्सनले छात्रवृत्ति, शैक्षिक नीति, र अन्य मुद्दामा दबाब दिनका लागि एक हप्ताभन्दा बढी समयदेखि विद्यालय बन्द गरेका थिए।