जनकपुरधाममा झिझिया महोत्सवको दोस्रो संस्करण बुधबार आयोजना हुँदै

जनकपुरधाम/असोज २१ गते । जनकपुरमा सांस्कृतिक नृत्य झिझिया महोत्सवको दोस्रो संस्करण बुधवार आयोजना हुने भएको छ। नव मिथिला फाउन्डेसनको आयोजनामा हुने यो महोत्सवले मिथिलाको लोक संस्कृति, लोक गायन र धार्मिक परम्परालाई उजागर गर्ने उद्देश्य लिएको छ। फाउन्डेसनका अध्यक्ष अमित कुमारका अनुसार महोत्सवमा यसपालि गाउगाउका झिझिया टोलीसँगै दुई स्थानीय विद्यालयका छात्राहरूले समेत झिझिया नृत्य प्रस्तुत गर्नेछन्। पहिलोपटक पाँच सय जना महिलाले टाउकोमा घैँटा राखेर झिझियाको गीतमा नृत्य प्रदर्शन गर्ने तयारी गरिएको छ।

रेल्वे स्टेशनको प्रांगणमा आयोजना हुने यो महोत्सवमा मैथिली झिझिया लोकगान र नृत्यलाई विशेष प्राथमिकता दिइएको छ। फाउन्डेसनका उपाध्यक्ष आदित्य नेपालले कार्यक्रमलाई सफल बनाउन स्थानीय लोक गायकहरूको पनि सहभागिता रहेको जानकारी दिए। साथै, ललित कामतको एकल लोकगीत प्रस्तुति र जनकपुरियन बैंडको सांगीतिक कार्यक्रम पनि महोत्सवमा समावेश गरिएको छ।

फाउन्डेसनले विगत पाँच वर्षदेखि जनकपुर साहित्य महोत्सव आयोजना गर्दै आएको छ। उपाध्यक्ष नेपालले भने, “झिझिया लोप हुँदै गएको छ। यसको संरक्षण हाम्रो जिम्मेवारी हो। झिझियाको महत्व र औचित्य नयाँ पुस्ताले बुझोस् भन्ने उद्देश्यले हामीले प्रत्येक वर्ष यो महोत्सव गर्ने निर्णय गरेका छौं।”

महोत्सवको आयोजना मिथिला संस्कृतिलाई नयाँ पुस्तामा हस्तान्तरण गर्ने र यसको लोप हुन नदिन प्रेरित गर्ने उद्देश्यले गरिएको हो।