गिरिजानन्द साह/असोज १७ गते। जिल्ला प्रहरी कार्यालय धनुषा लगायत जनकपुरधाम उमनपा को समन्वय र सहकार्यमा सवारी दुर्घटनाको रोकथाम र न्यूनिकरणको लागि चाडपर्व लक्षित ट्राफिक जनचेतनामुलक विशेष अभियान सुरुवात गर्नुको साथै यात्रु सहायता डेस्क स्थापना गरिएको छ ।
चाडपर्वको समयमा सवारी दुर्घटना न्यूनीकरणका लागि जनकपुरधामको रामानन्द चौकमा भव्य ट्राफिक जनचेतनामूलक कार्यक्रम सम्पन्न भएको छ। ट्राफिक प्रहरी कार्यालय धनुषाको आयोजनामा सम्पन्न यस कार्यक्रममा लापरवाह सवारी सञ्चालन र ट्राफिक नियम उल्लंघन गर्दा हुने जोखिमबारे गहन जानकारी दिइएको थियो।
कार्यक्रमको नेतृत्व ट्राफिक प्रहरी निरीक्षक हरि बहादुर ओलीले गरेका थिए। उद्घाटन कार्यक्रममा मधेश प्रदेश प्रहरी कार्यालयका प्रमुख श्रीमान प्र.ना.म नि लालमणि आचार्य ज्यू, जनकपुरधाम उमनपा का मेयर मनोज कुमार साह ज्यू, जिल्ला प्रहरी कार्यालय धनुषाका प्रमुख भुवनेश्वर तिवारी ज्यू , मधेश प्रदेश प्रहरी गणका प्रमुख नारायण रन्जितकारज्यू , यातायात व्यवसायी समितिका अध्यक्ष मनोज चौधरीज्यू , ८ न. वडा अध्यक्ष दिनेश सिंह ज्यू , प्रहरी अधिकृतहरु, स्थानिय जनप्रतिनिधि, यातायात व्यावसायी, यातायत मजदुरहरुका साथै संचारकर्मीहरु समेतको उपस्थिती रहेको थियो ।
कार्यक्रममा सहभागीहरूले चाडपर्वको समयमा बढ्ने सवारी चाप र सम्भावित दुर्घटनाबाट जोगिन आवश्यक ट्राफिक नियमहरूको पालनाको महत्वबारे सन्देश प्राप्त गरे। कार्यक्रममा उपस्थित प्रमुख व्यक्तित्वहरूले सुरक्षित सवारी सञ्चालन र ट्राफिक नियमहरूको पालना गर्न जनसमुदायलाई आग्रह गरे। प्रहरी निरीक्षक हरि ओलीले भने, “चाडपर्वको उल्लासमय वातावरणमा सवारी दुर्घटनाको जोखिम बढ्छ, तर हामी सबैले सावधानी अपनाउने हो भने दुर्घटनाहरूलाई सजिलै नियन्त्रण गर्न सक्छौं।”
सर्वसाधारणलाई आफ्नै र आफ्नो परिवारको सुरक्षाको लागि सचेत रहन र ट्राफिक नियमहरूको पालना गर्न आह्वान गरिएको थियो।धनुषा जिल्लाको बसपार्क, रमानन्द चोक,पोर्ताहा, ढल्केबर र लालगढ लगायत स्थानमा यात्रु सहायता कक्षको स्थापना भएको छ ।
यात्राका क्रममा यात्रुहरुलाई कुनै प्रकारको असहज, असुरक्षित महसुस भएमा वा सामान छुटेमा नजिकैको यात्रु सहायता कक्ष अथवा प्रहरीको हटलाइन नम्बर १०० ट्राफिक प्रहरीको हटलाइन नम्बर १०३ मा सम्पर्क गर्न हुन समेत सुचित गरिन्छ ।
Discussion about this post