फागुन १९ गते। जनकपुरधामको पर्यटकीय विकासका लागि सम्बन्धित निकायसँग पहल गर्ने भिजिट जनकपुरधाम २०२४ ले निर्णय गरेको छ ।
शनिवार भिजिट जनकपुरधाम २०२४ को प्रचार प्रसार समितिको बसेको बैठकबाट जनकपुरधामको पर्यटकीय विकाससहित जानकी मन्दिर सहितका मठ मन्दिर लगायत विभिन्न ऐतिहासिक पूर्वाधार धरोहरको व्यवस्थापनका लागि सम्बिन्धत निकायसँग पहल गर्ने भन्ने निर्णय गरिएको हो ।
बैठकमा सहभागीहरुले जानकी मन्दिर सहित नगरका विभिन्न भागमा रहेको फोहोरले गर्दा बाह्य पर्यटकहरुमा गइरहेको नाकारात्मक सन्देश, जानकी मन्दिरमा अव्यवस्थित व्यवस्थापन, मन्दिर वरिपरिको ट्राफिक अव्यवस्थापन र पर्यटक भित्रियाउन जानकी मन्दिर सहित अन्य मठ मन्दिरको प्रचार प्रसार कसरी गर्न सकिने बारे छलफल गरेका हुन् ।
भिजिट जनकपुरधाम अभियान सफल पार्न यहाँका मठ मन्दिरको प्रचार प्रसारका लागि सामाजिक सञ्जाल लगायतका अन्य माध्यम प्रयोगमा जोड दिइने लगायतका कुरामा समेत छलफल भएको जनाइएको छ ।
भिजिट जनकपुरधामका संयोजक अम्भु प्रसाद साहको संयोजकत्वमा बसेको बैठकमा प्रचार प्रसार समितिका संयोजक दिपक गुप्ता, सल्लाहकार सुभाष कर्ण, राजकमल सिंह, सह संयोजक स्मृति मिश्रा, सदस्यहरु गिरिजानन्द साह,रुबी झा, रुबी झा, माला राय, रोहिकुमार साह र सतो नेपालका मधेश प्रदेश अध्यक्ष विरेन्द्र साह लगायतका व्यक्तिहरुको सहभागिता रहेको थियो ।

















Discussion about this post