माघ ९ गते। युवकलाई गोली हानी हत्या गरेको आरोपमा बारा प्रहरीले भारतीय सुटर समूहका रुपेश महतोलाई पक्राउ गरेको छ ।
बाराको पचरौता नगरपालिक-६ नेपाल-भारत सीमा नजिक बेल्दारी गाउँको लक्ष्मीनिया पोखरी नजिक एक भारतीय युवकलाई गोली हानी हत्या गरेको आरोपमा महतोलाई पक्राउ गरिएको हो ।
भारत बिहार राज्यको मोतिहारी जिल्ला दर्पा थानाअन्तर्गतका सुकलहिया गाउँका २२ वर्षीय रूपेश महतोलाई पक्राउ गरिएको जिल्ला प्रहरी कार्यालयका प्रवक्ता प्रहरी नायव उपरीक्षक दधिराम न्यौपानेले जानकारी दिए । गत असोज ९ मा सुकलहियाकै २२ वर्षीय अजितकुमार सिंहलाई भारतबाट मोटरसाइकलमा नेपाल तर्फ ल्याएर हत्या गरिएको थियो । पक्राउ परेका रूपेशलाई बारा जिल्ला अदालतबाट म्याद थप गरी कलैयास्थित जिल्ला प्रहरी कार्यालयको हिरासतमा राखी थप अनुसन्धान भइरहेको प्रवक्ता न्यौपानेले बताए । विशेष सुराकीको सूचनाको अधारमा रूपेशलाई पक्राउ गरिएको हो ।
अजितलाई उनकै श्रीमतिकी मिलेमतोमा हत्या गरिएको प्रहरी अनुसन्धानबाट खुलेको छ । अजितकी श्रीमतीसमेत पक्राउ परिसकेकी छिन् । अजित र उनकी श्रीमती बाराको सिम्रौनगढ बजारमा कोठा भाडा लिएर बस्दै आएका थिए । उनीहरू प्रेम विवाह गरेर नेपाल बस्दै आएका थिए । अजित आफ्नो घर भारतमा गएको बेला भारतबाटै सुटर समूहले नेपालमा ल्याइ हत्या गरेको प्रहरी अनुसन्धानबाट खुलेको छ ।

















Discussion about this post