पुस १२ गते। जनमत पार्टीले स्वराज आन्दोलन, मधेश आन्दोलन र किसान आन्दोलन लगायतका आन्दोलनमा लगाइएका मुद्दाहरु फिर्ता लिन नेपाल सरकारलाई दबाब दिएको छ।
बुधबार काठमाडौं स्थित जनमत पार्टी कार्यालयमा आन्दोलनकारीहरुको बैठक पश्चात गृहमन्त्री नारायणकाजी श्रेष्ठलाई मुद्दाहरु फिर्ता लिन दबाब स्वरुप ज्ञापनपत्र बुझाएको छ।
जनमत पार्टीका राष्ट्रिय अध्यक्ष डा.सीके राउतले मधेशी-थारु एवं सीमान्तकृतहरुको आन्दोलनमा लागेका आन्दोलनकारीहरुको मुद्दाहरु फिर्ता गराउने जिम्मेवारी जनमत पार्टीको काँधमा आएको बताए।
गृहमन्त्री श्रेष्ठलाई तत्काल आन्दोलनकारीहरुमाथिको धरपकड रोक्न र कानुन संशोधन प्रक्रिया अगाडि बढाएर मुद्दाहरु फिर्ता लिन अध्यक्ष राउतले आग्रहसमेत गरे ।
आन्दोलनकारी तथा शहीद परिवारको तर्फबाट मु्द्दा फिर्ता लिन, धरपकड नगर्न, शहीद परिवार तथा घाइतेहरूलाई राज्यबाट सहयोग उपलब्ध गराउनेसहितका मागहरूको विषयमा गृहमन्त्री श्रेष्ठसंग छलफल भएको पार्टीका सचिव बीपी साहले जानकारी दिए।
जनमत पार्टीका राष्ट्रिय उपाध्यक्ष ई.दीपक कुमार साह,सचिव बीपी साह, स्वराज आन्दोलनका सहीद राम मनोहर यादवको भाई बिष्णु यादव, स्वराज आन्दोलनका अगुवा आन्दोलनकारी रामशंकर महाशेठ, संजय यादव, किसान आन्दोलनका आन्दोलनकारी धनिकलाल मण्डल लगायतको उपस्थितिमा गृहमन्त्रीलाई ज्ञापनपत्र बुझाएको हो।
Discussion about this post