उडिरहेको बुद्ध एयरको जहाजमै कु टाकुट

चैत २४ गते। बुद्ध एयरको जहाजमा दुई यात्रुबीच झगडा भएको छ ।

बुधबार बेलुका ४ बजेर ३० मिनेटमा विराटनगरबाट काठमाडौंका लागि उडेको फ्लाइट नम्बर ७१० मा दुई यात्रुबीच झगडा भएको हो । उनीहरु चिनजानकै व्यक्ति थिए ।

पारिवारिक कुरामा विवाद भएको र विवादले चर्काे रुप लिँदा हात हालाहाल भएको थियो । जुन् भिडियो अहिले सामाजिक सञ्जालमा ‘भाइरल’ भइरहेको छ ।

उक्त विमान त्रिभुवन अन्तर्राष्ट्रिय विमानस्थलमा अवतरण भएपछि बुद्ध एयरले ती दुई यात्रुलाई काठमाडौंस्थित विमानस्थलको सुरक्षा निकायलाई जिम्मा लगाएको छ ।

विमानस्थल सुरक्षा निकायले ती यात्रुलाई थप कारबाहीको लागि महानगरीय प्रहरी वृत्त गौशालालाई बुझाएको छ । अहिले ती यात्रुहरु प्रहरी वृत्त गौशालामा राखिएको छ ।

बुद्ध एयरले घटनाको बारेमा बिहीबार नेपाल नागरिक उड्डयन प्राधिकरणलाई जानकारी गराएको थियो ।

के हुन्छ कारबाही ?

विमानस्थल सुरक्षा भड्किने गतिविधि गरेमा, फ्ल्याइटको सुरक्षालाई चुनौती हुने र फ्ल्याइटको नियम पालना नगर्ने यात्रुलाई ‘गैरसैनिक हवाई उडान ऐन २०१५’ र ‘नागरिक उड्डयन सुरक्षा नियमावली २०७३’ अनुसार कारबाही हुने प्राधिकरणका सूचना अधिकारी ज्ञानेन्द्र भुलले बताए ।

“बुधबार बुद्ध एयरको उडानमा भएको घटना पारिवारिक विषयमा विवाद हुँदा घटेको थियो । ती यात्रुलाई प्रहरीको जिम्मा लगाएको र प्रहरी आफ्नो ऐनअनुसार कारबाही प्रक्रिया अघि बढाउछ,” सूचना अधिकारी भुलले भने ।

“ती यात्रुलाई विमानस्थल सुरक्षा निकायलाई जिम्मेवारी लगाइएको थियो । विमानस्थल प्रहरीले महानगरीय प्रहरी वृत्त गौशालालाई जिम्मेवारी लगाएको छौँ । प्रहरीले आफ्नो नियम, कानुन अनुसार कारबाही गर्छ,” भुलले भने, “विमान, क्याबिन क्रुलाई असर नपरेको देखिन्छ । यस घटनाको बारेमा हामीले थप अध्ययन गरिरहेका छौं । अध्ययनपछि थप प्रक्रिया अघि बढाउछौं ।”