काठमाण्डौ/चैत १९ गते । नेपाल राष्ट्र बैंकले लघुवित्त वित्तीय संस्थाहरुमा देखिएका समस्या समाधान गर्न चाल्नुपर्ने कदमहरुका बारेमा सुझाव पठाउन सरोकारवाला निकायहरुसँग आग्रह गरेको छ।
राष्ट्र बैंकको आर्थिक अनुसन्धान विभागले आज एक सूचना प्रकाशित गरी सुझाव माग गरेको हो। राष्ट्र बैंक सञ्चालक समितिको निर्णयबमोजिम आर्थिक अनुसन्धान विभागका कार्यकारी निर्देशकको संयोकत्वमा लघुवित्त वित्तीय संस्थाको वर्तमान समस्या र समाधानका उपायहरुको विषयमा अध्ययन गर्न समिति गठन भएको छ। समितिले अध्ययन कार्य पनि प्रारम्भ गरिसकेको छ।
यसै सन्दर्भमा यस विषयसँग सरोकार राख्ने सम्पूर्णले लघुवित्त वित्तीय संस्थाको वर्तमान समस्या र यो समस्या समाधान गर्न चाल्नुपर्ने कदमका बारेमा ई–मेल [email protected] मा सुझाव पठाउन राष्ट्र बैंकले आग्रह गरेको छ। सुझाव आउँदो वैशाख २० गतेभित्र पठाउन आग्रह गरिएको छ।
पछिल्लो समय देशैभरीबाट ग्रामीण क्षेत्रमा लघुवित्तहरुले कर्जाको नाममा अनावश्यक ऋणको भारी बोकाएको, बढी ब्याज लिएको, मनलाग्दी सेवा सुल्क लिएको र एकै व्यक्तिलाई दर्जनौं संस्थाहरुले कर्जा लगानी गरेको भन्दै विरोध भइरहेको छ ।
यसका विरुद्ध देशैभरीबाट लघुवित्त वित्तीय संस्था विरुद्धको संघर्ष समिति नै बनाएर ऋणीहरु आन्दोलनमा होमिरहेका छन् । लघुवित्त संस्था र ऋणीहरुबीचको यस्तो द्वोद्वको स्थिति बनेपछि राष्ट्र बैंकले अध्ययन थालेको हो ।
Discussion about this post