मधेश आन्दोलनका शहीदहरूलाई प्रधानमन्त्री पुष्पकमल दाहाल ‘प्रचण्ड’सहित केही पार्टीका सांसदहरूले अपमान गरेको भन्दै नेपाली कांग्रेस मधेश कार्यसमितिले आपत्ति जनाएको छ ।
नेपाली कांग्रेस मधेश प्रदेश कार्यसमितिले मधेश बलिदानी दिवसको अवसरमा प्रतिनिधिसभाको वैठकमा मधेश आन्दोलनका शहीदको सम्मानमा जनमत पार्टीका अध्यक्ष डा. सिके राउतद्वारा गरिएको मौनधारणको अनुरोधलाई प्रधानमन्त्री प्रचण्डसहित केही सांसदहरू अवज्ञा गर्नु दुःखद रहेको जनाएको छ ।
प्रदेश सभापति कृष्ण यादवले शुक्रबार जारी गरेको प्रेस विज्ञप्तिमा मधेश आन्दोलनका शहीदप्रति देखाइएको यो हठ्ठी रवैया मधेशी जनताको अपमान र मधेशी जनताप्रति विभेदपूर्ण मानसिकताको उपज रहेको जनाइएको छ ।
मधेशका शहीदहरूलाई अपमान गर्ने गरी प्रधानमन्त्री, केही मन्त्री र केही सांसदले देखएको व्यवहारले मधेश आन्दोलनलाई मान्यता नदिने मनसाय देखिएको विज्ञप्तिमा उल्लेख छ । आगामी दिनमा यस्ता घटना नदोहरियोस् भन्दै प्रधानमन्त्री प्रचण्डलगायत सबै पक्षलाई कांग्रेसले ध्यानाकर्षण गराएको छ ।
Discussion about this post