काठमाडौं/बैशाख २७ गते । सरकारले आउदो जेठ १ गतेबाट सातामा दुई दिन बिदा दिने निर्णय गरिसकेको छ।
जेठ १ बाट अब हप्तामा शनिबार र आइतबार सार्वजनिक बिदा हुने छ। मन्त्रिपरिषद्ले गरेको सो निर्णय राजपत्रमा प्रकाशित भएको छ।
कुनै पनि सरकारी निर्णय राजपत्रमा छापिएपछि त्यो कार्यान्वयनमा जाने गर्छ। यही २६ गते राजपत्रमा प्रकाशित सूचनाअनुसार हरेक शनिबार र आइतबार बिदा दिने र अन्य दिन बिहान ९ः३० देखि अपराह्न ५ः३० बजेसम्म कार्यालय समय रहने उल्लेख गरेको छ। यद्यपि कात्तिक १६ देखि माघ १५ गतेसम्म भने कार्यालय समय बिहान ९ः३० बजेदेखि अपराह्न ४ः३० बजेसम्म मात्रै रहने जनाइएको छ।
प्रकाशित सूचनाअनुसार विसं २०७९ का लागि निर्धारण भएको दशैँ र तिहारका सार्वजनिक बिदाबाहेक अन्य बिदा लगातार दुई दिनभन्दा बढी भएमा सार्वजनिक सेवा प्रवाह गर्ने अस्पताल, स्वास्थ्यचौकी, रोपवे, टेलिफोन, प्रहरी, विद्युत्, खानेपानी, अध्यागमन विभाग, वारुणयन्त्र टक्सार, रेडियो नेपाल, नेपाल टेलिभिजन, मुद्रण विभाग, कन्सुलर, सेवा राहदानी सेवा हुलाक जिल्ला प्रशासन कार्यालय, बैंकिङ, सेवा, आन्तरिक राजस्व, भूमिसुधार, मालपोत, नापी, भन्सार, स्थानीय तहले तेस्रो दिनदेखि गृह मन्त्रालयले समय निर्धारण गरेबमोजिम सेवा प्रवाहको व्यवस्था मिलाउने उल्लेख छ।
मन्त्रालयले कार्यालयमा सार्वजनिक बिदा समयमा सेवा प्रदान गर्ने कर्मचारीलाई सट्टा बिदा दिने गरी सम्बन्धित निकायले कर्मचारीको व्यवस्थापन गर्न भनिएको छ।
नेपाल सरकार मन्त्रिपरिषद्को यही वैशाख १३ को बैठकले हप्तामा दुई दिने बिदा दिने निर्णय गरेको थियो।
हेर्नुहोस राजपत्रमा प्रकाशित सूचना
Discussion about this post