धनुषामा मनोनयनसँगै उम्मेदवार घरदैलो अभियानमा

जनकपुरधाम/बैशाख १३ बैशाख । आसन्न स्थानीय तह निर्वाचनका लागि उम्मेदवारी दर्ता राएका उम्मेदवारहरु घरदैलो अभियानको तयारीमा जुटेका छन् ।

गाउँ गाउँका मतदाताहरुलाई आफ्नो पक्षमा रिझाउन उम्मेदवारहरु घरदैलो अभियान सुरु गर्ने तयारी छन् ।

बिभिन्न दलका उम्मेदवारहरु आफ्नो पार्टीको घोषणापत्र र एजेण्डा बोकेर मतदाताहरुको घर घरमा पुग्ने तयारीमा छन् भने स्वतन्त्र उम्मेदवारहरु आफ्नो व्यक्तिगत एजेण्डा सुनाउँदै मतदाताहरुसँग मत माग्न थालेका छन् ।

‘‘उम्मेदवारी दत्र्ता गराएसँगै हामी घरदैलो सुरु गर्ने तयारीमा छौं”, जसपाका तर्फबाट जनकपुरधाम उपमहानगरपालिकाका नगरप्रमुखका उम्मेदवार लालकिशोर साहले भने,‘‘ हुन त पहिलादेखि नै जनताको घर घरमा पुग्दै आएका थियौ, तर अब गठबन्धनका सबै उम्मेदवारलाई सँगै लिएर घरदैलोमा जान्छौं ।” सत्तारुढ गठबन्धनका तर्फबाट नगरप्रमुखमा साहले उम्मेदवारी दिएका छन् भने उपप्रमुखमा नेपाली काँग्रेसका किशोरी साहले उम्मेदवारी दिएका छन् ।

यस्तै नेकपा एमालेका उम्मेदवारहरुले पनि घरदैलो अभियानलाई पनि आजैदेखि तिब्रता दिने बताएको छ ।

‘‘हामीले हिजो उम्मेदवारी दत्र्ता गरायौं र अब घरदैलो अभियान सुरु गर्छौं, नेकपा एमालेका तर्फबाट जनकपुरधामका नगरप्रमुखका उम्मेदवार शिबशंकर साह (हिरा(ले भने ‘‘ पहिलो उम्मेदवारीकै टुङ्गो लागेको थिएन्, त्यही भएर राम्ररी घरदैलो र प्रचार प्रसार गर्न सकेको थिएन् ।अब उम्मेदवारी दत्र्ता भईसकेकाले जनताको घर घरमा पुग्छौं”

घरदैलोका क्रममा मतदाताहरुसँग पार्टी घोषणापत्र र आफुहरुको एजेण्डा बारे छलफल समेत गरिने उनले बताए ।

जनकपुरधाम उपमहानगरबाहेक धनुषाका सबै पालिकामा उम्मेदवारी दिएको नेकपा माओवादी केन्द्रले पनि चुनाबी प्रचार अभियान छिट्टै सुरु गर्ने तयारीमा छ ।

पार्टीभित्र आकांक्षीहरु बढी भएकाले अन्तिम समयमा मात्र उम्मेदवार छनौट गरेर धनुषाको १७ स्थानीय तहमा उम्मेदवारी दर्ता गराएको माओवादी केन्द्रका उम्मेदवारहरुले एकैसाथ चुनाबी अभियान सुरु गर्ने तयारी भईरहेको नेकपा माओवादी केन्द्रका धनुषा अध्यक्ष तथा धनुषाधाम नगरपालिकाका नगरप्रमुख पदका उम्मेदवार दिपक कुमार यादवले बताए ।

‘‘उम्मेदवारी दर्ता गराएसँगै हामी घरदैलो अभियानमा जान्छौं”, उनले भने ‘‘ यसपालिकाको चुनाबमा प्रचार प्रसार गर्ने समय कम छ, त्यसैले ढिलाई नगरी जनताको घर घरमा पुग्ने छौं ।” घरदैलोको क्रममा जनतासँग पार्टीको योजना बारे छलफल गर्ने छौं, उनले भने ।

नेपाली काँग्रेस, जनमत पार्टी लगायतले पनि घरदैलो अभियान सुरु गरिसकेको बताएको छ । उम्मेदवारहरु मतदाताहरुसँग मत माग्न गाउँ गाउँमा पुग्न थालेपछि गाँउबस्तीलाई चुनाबी माहौलले छोपिसकेको छ ।

धनुषाको १८ वटै स्थानीय तहमा हिजो शान्तिपुर्ण रुपमा उम्मेदवारी मनोनयनपत्र दर्ता सम्पन्न भएको थियो ।