दिवार, अमर अकबर एन्थोनी, सुहाग, काला पत्थर, द बर्निङ ट्रेन, शान र कालियाजस्ता उत्कृष्ट फिल्ममा अभिनय गरेकी परवीन बाबीको आज ६८ औँ जन्मजयन्ती हो । जुन समयमा नायिका भारतीय नारीको लुकले चिनिन्थे त्यतिबेला परवीन आफ्नो बोल्ड र वेस्टर्न लुकले चर्चित भइन् । परवीनले जति तीब्र गतिमा सफलता हासिल गरिन् त्यसै गतिमा उनी गुमनामको दुनियाँमा पनि गइन् । परवीन अचानक सेटबाट गायब भइन्, यस्तो हुनुमा उनको अन्डरवर्ल्डसँगको सम्बन्धलाई कारण बताइयो ।
परवीनको डेनी डेन्जोङ्पा, महेश भट्ट, कबिर बेदीसँग नाम जोडियो । उनको मानसिक स्थिति बिग्रियो र उनीसँग ती व्यक्ति टाढा भए । परवीनको स्थिति यतिसम्म बिग्रियो कि जब उनलाई न्यूयोर्कको अन्तर्राष्ट्रिय विमानस्थलमा आफ्नो परिचय प्रमाणित नगरेका कारण पागलसँगै राखियो तब उनी हासेको हास्यै भइन् । अन्तिम दिनमा परवीनलाई ठूला सेलिब्रिटीबाट ज्यानको खतरा महसुस हुन थाल्यो । आज नायिकाको जन्म जयन्तीको अवसरमा उनको मुश्किलले भरिएको रहस्यमय यात्रा कस्तो रह्यो भन्ने जानकारी लिऔँ ।
५ वर्षको उमेरमा पिता गुमाइन्ः
४ अप्रिल सन् १९५४ मा जुनागढ, गुजरातमा परवीन बाबीको जन्म वली मोहम्मद खानको घरमा भयो । परवीनको जन्म उनको आमा–बुवाको विवाह भएको १४ वर्षपछि भएको थियो । पाँच वर्षको हुँदा नै उनले आफ्नो पिता गुमाइन् । अहमदाबादबाट पढाई पूरा गरेपछि परवीनले मोडलिङ सुरु गरिन् । कलेजमा दिनमा नै परवीनले चुरोट पिउने गर्थिन् । एक दिन चुरोट तानिरहेकी परवीनमाथि फिल्म निर्माता बिआर इशाराको नजर पर्यो र परवीनलाई हिरोइन बनाउने सोचे ।
परवीनले सन् १९७३ को फिल्म चरित्र पाइन् । फिल्म फ्लप थियो तर परवीनले थुप्रै्र फिल्म पाइन् । उनले मजबुर (१९७४), दिवार (१९७५) जस्ता दर्जनौँ हिट फिल्म दिइन् ।
जब सेटबाट अचानक गायब भइन् परवीनः
सन् १९८३ मा परवीन एउटा फिल्मको सुटिङ गर्दागर्दै अचानक सेटबाट गायब भइन् । उनले न कसैलाई जानकारी दिइन् न नै यसबारे कसैलाई केही खबर थियो । यतिबेला परवीनमाथि अन्डरवर्ल्डका मानिसको नजर थियो बताइयो, यसैकारण उनलाई गायब गरिएको बताइयो । नायिकाका थुप्रै फिल्म उनको अनुपस्थितिमा रिलिज भयो । ६ वर्षपछि परवीन मुम्बई आइन् र उनले अध्यात्मका लागि इन्डष्ट्रि छोडेको स्पष्टिकरण दिइन् ।
विवादमा रह्यो अफेयरः
परवीन बाबीको इन्डष्ट्रिमा पहिलो अफेयर डेनी डेन्जोङ्पासँग रह्यो । यो करिब ४ वर्षसम्म रह्यो । परवीन कबिर बेदीसँग पनि सम्बन्धमा रहिन्, तर यो सम्बन्ध धेरै दिनसम्म चल्न सकेन । सन् १९७७ तिर परवीनलाई महेश भट्ट मन पर्यो । महेश पहिला नै विवाहित थिए र इन्डष्ट्रिमा स्ट्रगल गरिरहेका थिए जबकी परवीन त्यतिबेला एक सफल नायिका थिइन् ।
हत्कडी लगाएर पागलखाना लगियोः
सन् १९८४ मा परवीन बाबीलाई न्यूयोर्क विमानस्थलमा प्रहरीले पक्राउ गरेर पागलखानामा बन्द गराएको थियो । परवीनले विमानस्थलमा अचम्मको व्यवहार गरिरहेकी थिइन्, जब सुरक्षाकर्मीले उनीसँग सोधपुछ गरे तब उनले आफ्नो परिचय दिन सकिनन् । उनलाई हत्कडी लगाएर मानसिक सन्तुलन गुमेकाहरुसँग बन्द गरियो । जानकारी पाउने बित्तिकै इन्डियन काउन्सिल उनी भएठाउँ पुग्दा परवीन मुस्कुराइरहेकी थिइन् ।
Discussion about this post