प्रदेश २ : अख्तियारले छापा मारेको विरोधमा जनकपुरमा जसपाको मोटरसाईकल जुलुस

जनकपुरधाम/असोज १७ गते ।जनता समाजवादी पार्टी (जसपा) ले प्रदेश २ का मुख्यमन्त्री तथा मन्त्रिपरिषद्को कार्यालयमा अख्तियार दुरुपयोग अनुसन्धान आयोगले छापा मारेको विरोधमा प्रदर्शन गरेको छ।जसपाका नेता कार्यकर्ताहरूले जनकपुरधाममा वृहत् मोटरसाईकल र्‍याली निकालेका हुन् ।

आज (आइतबार) जनकपुरस्थित रेल्वे स्टेसनमा भेला भएका जसपाका नेताकार्यकर्ताले अख्तियारविरुद्ध नाराबाजी गर्दै मोटरसाइकल र्‍याली निकालेका हुन। र्‍यालीमा गाउँ-गाउँबाट जसपाको सर्मथनमा मानिसहरू सहभागी भएका थिए । जसपा प्रदेश २ समितिले गरेको निर्णयअनुसार आठै जिल्लाको सदरमुकाममा मोरसाईकल र्‍याली निकालिएको हो । र्‍यालीमा वडादेखि केन्द्रसम्मको नेताहरूको सहभागिता थियो । अख्तियारलाई खबरदारी गर्नका लागि र्‍याली निकालिएको जसपाका धनुषा अध्यक्ष पशुपति यादवले बताए । उनका अनुसार अख्तियारले गत बुधबार नेकपा एमाले अध्यक्ष केपी शर्मा ओलीको निर्देशनमा प्रदेश २ सरकारलाई बदनाम गराउनका लागि छापामारी गरिएको थियो ।

जनकपुरको रेल्वे स्टेसनबाट सुरु भएको मोटरसाईकल र्‍याली शिव चोक, जनक चोक, राम चोक हुँदै भम्रपुरा चोक पुगेर रामानन्द चोक हुँदै पिडारी चोकमा कोण सभामा परिणत भएको छ । यसयघि जसपाका नेताहरूले असोज १६ मा प्रदेश २ को आठै जिल्लाको सदरमुकाममा साँझ मसाल जुलुस गरेका थिए । अख्तियार दुरुपयोग अनुसन्धान आयोग बर्दिबास कार्यालयले मुख्यमन्त्री कार्यालयमा गत बुधबार छापामारी गरेको थियो ।

अख्तियारले छापा मारेको विषयमा जसपा आपत्ति जनाउँदै विरोधमा उत्रिने आह्वान गरेको थियो। त्यसपछि अख्तियारविरुद्ध प्रदेश २ मा प्रदर्शन हुँदै आइरहेको छ।

मुख्यमन्त्री ‘बेटी पढाउ‚ बेटी बचाउ’ अभियानअन्तर्गत साईकल वितरण कार्यक्रमको फाईल अख्तियारले अनुसन्धानका लागि नियन्त्रणमा लिएको छ। साइकल खरिदमा अनियमितता आशंका गर्दै अख्तियारले बुधबार जनकपुरस्थित मुख्यमन्त्री तथा मन्त्रिपरिषद्को कार्यालयमा छापा मारेको थियो।