सप्तरीमा लागुऔषध सहित एक युवक प्रकाउ

उमेश कुमार साह/सप्तरी/श्रावण २ गते।सप्तरीको सुरुङ्गा नगरपालिका वडा नम्बर ०६ कडरबोना चौक स्थित गोप्य सुचनाको आधारमा ईलाका प्रहरी कार्यलाय कडरबोना सप्तरीबाट प्रहरी निरीक्षक बिरेन्द्र पासवानको कमान्डमा खटिएका प्रहरी टोलिले लागुऔषधसहित एक जना युवकलाई पक्राउ गरेकाछन् ।

ईलाका प्रहरी कार्यालय कडरबोनाका प्रमुख प्रहरी निरीक्षक बिरेन्द्र पासवान नेतृत्वको टोलीले गोप्य सुचानाको आधारमा पश्चिमबाट पुर्व तर्फ आउदै गरेको ना १ ज ७७१२ नम्बरको विङ्गर चेकजाँचको क्रममा विङ्गरको अगाडी चालक भन्दा बायाँ पट्टीको सिटमा बसेको सप्तरीको अग्नीसाईर कृष्णा सोवरन गाउँपालिका वडा नम्वर ५ जनडाैलका १९ वर्षको मो. सदर अलीलाई पक्राउ गरेकाछन् ।

विङ्गरमा सवार भई गईरहेका अलीको हातमा बोकेको निलो रङ्गको झोलाबाट १० थान नाट्रोभेट टेबलेट गरि ३०० पिस , ३८ थान फेर्नागन एम्पुल, ३८ थान नोफिन एम्पुल लगायत अन्य एम्पुल गरि ११४ थप एम्पुल लागू औसध बरामद भएकोछ ।अली माथि थप अनुसन्धान भइरहेको प्रहरी निरीक्षक बिरेन्द्र पासमानले जनाएको छ ।

प्रमुख पासवानका अनुसार खुल्ला सीमाना र लागूऔषधको सहज प्राप्ती कारोबार वृद्धिको प्रमुख कारण हो । ग्रामीण क्षेत्रमा हुने गाँजा र अफिम खेतीको भरपर्दो अनुगमन प्रणाली नहुनु, खर्चिलो सूचना ब्यबस्थापन विधि र बजेटको सीमितता नियन्त्रणका चुनौति हुन् । प्रमुख प्रहरी निरीक्षक पासवान भन्नुहुन्छ, “नयाँ कार्यविधि र शैली अपनाई हुने कारोबारको अनुसन्धानका लागि आधुनिक प्रविधियुक्त साधनस्रोत आवश्यक छ ।”गलत मनसायका व्यक्तिहरुले अर्थोपार्जनको उद्देश्यले लागूऔषध ओसारपसार गरिरहेको देखिन्छ । विशेष गरी युवावर्ग दुर्व्यसनीमा लागेको तथ्याङ्कले देखाएको छ । परिवार, समाज र विद्यालयबाट उचित मार्ग निर्देशन र हेरचाहको अभाव, सही निर्णय क्षमताको कमी, आनन्द प्राप्तिको अभिलाषा र साथीको संगत लगायतका कारणले युवावर्ग लागूऔषधको दुर्व्यसनीमा फसेको पाइन्छ ।

सामाजिक समस्याको रूपमा रहेको लागूऔषध नियन्त्रणमा पछिल्लो समय प्रहरी सक्रियताका कारण धेरै ठूलो संख्यामा अपराधी पक्राउ परेका हुन् । प्रहरी निरीक्षक पासवानको अनुसार हामीले नयाँ तरीकाले अपराध अनुसन्धान गर्न निर्देशन दिँदै आउनुभएको छ । सोही अनुरूप चौविसै घन्टा प्रहरी जाँच, कानुनी कारवाहीमा कडाई, नयाँ प्रविधिको प्रयोगका कारण कारोबारी निरूत्साहित भएका छन् । प्रहरी मात्रै होइन सरोकारवाला सम्पूर्ण पक्ष यसको नियन्त्रणको लागि जागरुक हुनुपर्ने जरुरी छ।साथै “यसलाई घटाउने चुनौती सामना गर्न ब्युरो मातहत नयाँ प्रहरी एकाई स्थापना गर्ने, जाँच कार्यमा कडाई गर्ने र जनचेतनामुलक कार्यक्रमलाई अझै विस्तार गर्ने योजना छ ।”