महोत्तरी,चैत ३१ गते।महोत्तरीको बर्दिबासमा नेपाली सेनाको जिप दुर्घटना हुँदा ५ जना सेना घाइते भएका छन् । पांग्रा पड्किएर बाटोमुनिको खोल्सामा जीप खस्दा घाइते भएका ५ मध्ये दुई सेनाको अवस्था गम्भीर भएको प्रहरीले जनाएको छ ।
दुर्घटनामा ३३ वर्षीय जमदार बुद्धमान राई, ३४ वर्षिय अमलदार सन्तोष विष्ट गम्भीर घाइते भएका छन् । त्यसैगरी ३४ वर्षीय पियूठ अमल थापा, २४ वर्षीय दशरथ थारु, ३८ वर्षीय नेपाली सेनाका गाडी चालक चेतराज राई पनि घाइते भएका प्रहरीले जनाएको छ । उनीहरुको बर्दिबासस्थित जनसेवा हस्पिटलमा उपचार भइरहेको छ ।घाइतेहरुलाई थप उपचारका लागि काठमाडौंस्थित छाउनी अस्पताल लैजान हेलिकप्टर ल्याउने तयारी भइरहेको सेनाले जनाएको छ ।
पानी तान्ने मोटर लिन नेपाली सेनाको टोली बर्दिबास हिँडेको थियो । जिपको अगाडिको देब्रतिरको पांग्रो पड्केपछि अनियन्त्रित भएर जिप पल्टिएको थियो । जीप १० मिटर गहिरो खोल्सामा खसेको प्रहरीले बताएको छ । दुर्घटनापछि घटना स्थलाबाट घाइते नेपाली सेनाका जवानलाई स्थानीय र प्रहरीले अस्पताल पुर्याएको जिल्ला ट्राफिक प्रहरी कार्यालय महोत्तरीले जनाएको छ ।
Discussion about this post