सप्तरीमा नेपाली सेनाको गाडीले ठक्कर दिँदा मोटरसाइकल चालकको मृत्यु

उमेश कुमार साह,राजविराज। पूर्व पश्चिम लोकराजमार्ग अन्तर्गत सप्तरीको रुपनी गाउँपालिका १ स्थित नेपाली सेनाको गाडीले बुधबार ठक्कर दिँदा मोटरसाइकल चालकको मृत्यु भएको छ ।

नेपाली सेनाको वानटन गाडीले ठक्कर दिँदा मोटरसाइकल चालक सप्तरीको अग्निसाईर कृष्णसवरण गाउँ पालिका वडा नम्बर २ बस्ने चेताई चौधरी र ६५ वर्षीय रामचन्द्र प्रसाद चौधरी थारुको मृत्यु भएको जिल्ला प्रहरी कार्यालय सप्तरीको प्रहरी नायब उपरीक्षक भुवनेश्वरप्रसाद साहले जानकारी दिनुभयो ।

पूर्वबाट पश्चिमतर्फ जाँदै गरेको बा. १ ग १९८१ नम्बरको नेपाली सेनाको वानटनले सोही दिशाबाट जादैँ गरेको स ५ प ५०७६ नम्बरको मोटरसाइकललाई ठक्कर दिएकाे हाे । ठक्करबाट घाइते थारुको उपचारको लागि राजविराजस्थित गजेन्द्रनारायण सिंह अस्पताल ल्याउने क्रममा बाटाेमा नै मृत्यु भएको प्रहरीले जनाएको छ ।

अदली बदली गर्नका लागि सूर्यदल गण विराटनगरबाट भैरवदल गण ललितपुरका लागि ३२ जना नेपाली सेनाको वानटनमा सवार रहेका थिए । उनीहरु सबै जना सकुशल रहेको बताइएको छ ।
मृतकको शव परीक्षणको लागि गजेन्द्र नारायण सिंह अस्पतालको शवगृहमा राखिएको छ भने गाडी र चालक सुनसरी धरान उपमहानगरपालिका वडा नम्बर १७ बस्ने वर्ष ३७ को मनिषराज राईलाई प्रहरीले नियन्त्रणमा लिई थप अनुसन्धान कार्य भइरहेको प्रनाउ साहले जानकारी दिनुभयो ।