विवाहपञ्चमी महोत्सव आजबाट शुरु,पहिलो दिन नगर दर्शन विधि मनाइयो

धनुषा।प्रत्येक वर्ष भव्यतासाथ मनाइने विश्व प्रसिद्ध रामजानकी विवाहपञ्चमी महोत्सव  जनकपुरधाममा नगर दर्शन विधिसंगै विवाहपञ्चमी महोत्सव सुरु भएको छ ।

एक हप्तासम्म चल्ने विवाहपञ्चमी महोत्सवको पहिलो दिन सोमबार नगरदर्शन विधि सम्पन्न भएको छ ।

कोरोना महामारीका बिच भईरहेको नगरदर्शन यस पटक प्रभावित भएको छ ।अन्य वर्ष जानकी मन्दिरको प्राङ्गनमा यो विधि गरिन्थयो तर यस पटक भने मन्दिर प्राङ्गण भित्रै केही साधुसन्त तथा श्रद्धालुहरुका बिच सम्पन्न भएको हो ।

विवाहपञ्चमी शुरु भएपछि भरीभराउ हुने जनकपुरधाममा अहिले खासै भीडभाड देखिएको छैन ।

यस वर्ष जानकी मन्दिरको प्राङ्गनमा रामलिलाको लागि लगाइएको पण्डालभित्रै नगर दर्शनको झाँकी प्रस्तुत गरिएको थियो ।

मिथिला नरेश राजा जनकको छोरी सीताको विवाहको स्मरणमा प्रत्येक वर्ष जनकपुरधाममा एक हप्तासम्म वैवाहिक कार्यक्रम मनाइने गरिन्छ ।

भगवान राम र लक्ष्मण पहिलो पटक प्राचिन मिथिलाको राजधानी जनकपुरधामको भ्रमण गरेको स्मरणमा प्रत्येक वर्ष विवाहपञ्चमी महोत्सव अन्तर्गत पहिलो दिन नगरदर्शन विधि गरिन्छ ।

नगरदर्शन विधिको अवसरमा मिथिलाको राजधानीमा मंगलगान समेत गाइएको थियो ।

मंगलमय दिन आजु हे, पाहून छथि आयल !
धनि–धनि जागल भाग हे, मन कमल फुलायल !!
मंगलमय दिन ‘‘ !!
मंगलघट सँ द्वारि सजाओल,
कंचन दीया बारि हम लाओल ,
गांथल हार गुलाब हे, हिनका पहिराओल !
मंगलमय दिन ‘‘‘!!

त्रेता युगमा समेत भगवान राम लक्ष्मण जनकपुरधाम आएपछि यस्तै स्वागत गान गाइएको हुन सक्ने संस्कृतिविद डा. रेवतीरमण लाल बताउँछन् । यो विषयमा वाल्मिकी रामायणमा समेत उल्लेख रहेको पाइन्छ ।

विवाहपञ्चमी महोत्सव अन्तर्गत दोस्रो दिन मंगलबार फुलवारी लिला, बुधबार धनुष यज्ञ, बिहिबार तिलकोत्सव, शुक्रवार मटकोर, शनिवार मुख्यदिन शुभविवाह र अन्तिम दिन रामकलेवा गरी विधिवत रुपमा यस समारोहको समापन गरिनेछ ।