सञ्चार उद्यममा देखा परेका साझा समस्याको समाधानका लागि मिडिया एलाईन्स नेपाल नामक संस्था स्थापना

काठमाण्डौ।सञ्चार उद्यममा देखा परेका साझा समस्याको समाधान गर्नका लागि बुधबार (आज) मिडिया एलाईन्स नेपाल नामक संस्था स्थापना गरिएको छ ।

सञ्चारसम्बन्धि नीति र कानून निर्माणमा सञ्चार उद्यमीको दृष्टिकोण राख्ने, तिनलाई जनउत्तरदायी बनाउने तथा सञ्चार क्षेत्रमा कार्यरत पत्रकार, कर्मचारी र कामदारको हकहित संरक्षणका साथै उद्यमीको लगानीको संरक्षणमा पहल गर्ने उद्देश्यले सञ्चार उद्यमीहरुको साझा संस्थाको रुपमा एलाईन्स स्थापना भएको हो ।

सञ्चार क्षेत्रलाई निष्पक्ष, तटस्थ र जनउत्तरदायी बनाई सञ्चार उद्यमीहरुको हकहित संरक्षण, सञ्चार उद्यममा देखा परेका समस्याको एकिकृत समाधान गर्दै, तटस्थ, निष्पक्ष र जनउत्तरदायी समाजको निर्माणमा एलाईन्स सक्रिय रहने छ ।

संस्था दर्ता प्रक्रियामा रहेकाले हाल संस्थाको तदर्थ समिति गठन गरिएको छ । निकट भविष्यमै संस्थाको दर्ता प्रक्रिया सम्पन्न गरी अन्य कामलाई विधिवत रुपमा अघि बढाइने एलाईन्सले जनाएको छ ।

अलाइन्सको अध्यक्षमा एभिन्यूज टेलिभिजनका अध्यक्ष भाष्करराज कर्णिकार रहेका छन्। सल्लाहकारमा अन्‍नपूर्ण मिडिया नेटवर्कका अध्यक्ष क्याप्टेन रामेश्‍वर थापा र रिपब्लिका मिडिया प्रालिका अध्यक्ष विनोद ज्ञवाली रहेका छन्।

अलाइन्सको उपाध्यक्षमा राजधानी न्यूज पब्लिकेशन प्रालिका महेन्द्र शेरचन र माउन्टेन टेलिभिजनका अध्यक्ष राजु कँडेल रहेका छन् भने महासचिवमा इमेज च्यानलका सिइओ लक्ष्मण हुँमागाइ र कोषाध्यक्षमा इप्रेशन पब्लिकेशन्स तथा मिडिया प्रालिका अध्यक्ष उज्जवल शर्मा रहेका छन्।

कार्यसमितिको सदस्यमा रिपब्लिका मिडियाका सिइओ समृद्धि ज्ञवाली, प्राइम टेलिभिजनका अध्यक्ष ऋषि धमला र एपीवान टेलिभिजनका उपाध्यक्ष राजेन्द्र शाक्य रहेका छन्।