जनकपुर।जसपाका अध्यक्षद्वय उपेन्द्र यादब र महन्थ ठाकुरले समेत विज्ञप्ती जारी गरेर संविधान दिवस नमनाउने र विरोधका कार्यक्रम गर्न आह्वान गरेको छ । संविधानका विभेदकारी प्रावधानहरू संशोधन नभएको भन्दै उसले दिवस नमनाउने भएको हो । यसअघि पनि मधेसकेन्द्रित दलहरूले कहिले ‘कालो दिन’ का रूपमा त कहिले विरोधका कार्यक्रम गरेर बष्हिकार गर्दै आएका थिए ।
जनआन्दोलन, सशस्त्र द्वन्द्व, मधेस जन विद्रोहलगायतका बेला सरकारसँग भएका सम्झौता, अन्तरिम संविधानमा भएका प्रावधान र पहिलो संविधानसभामा सर्वसम्मत भइसकेका विषय तथा जनताको अभिमतलाई समेत अनादार गरी संविधान जारी भएको जसपाले दाबी गरेको छ । उसले विभेदकारी प्रावधान संशोधन नगरेसम्म संविधानको स्वामित्व विस्तार नहुनेसमेत जनाएको छ । ‘विभेदकारी, अधुरो, अपुरो एवं त्रुटिपूर्ण संविधानले मधेसी, आदिवासी जनजाति, दलित, सिल्पी, महिला, खस, मुस्लिम, थारू, अल्पसंख्यक समुदायका साथै उत्पीडित जातजाति एवं समुदायले उठाउँदै आएका राष्ट्रिय मुद्दाहरूलाई सम्बोधन गर्न सकेको छैन,’ जसपाका अध्यक्षद्वय महन्थ ठाकुर र उपेन्द्र यादवद्वारा शुक्रबार जारी विज्ञप्तिमा भनिएको छ ।
संविधानमा संघीयता, समावेशी लोकतन्त्र, राष्ट्रिय पहिचान, समानुपातिक समावेशीकरणलगायत प्रावधान पनि अधुरो रहेको जसपाको जिकिर छ ।
जसपाले असोज ३ गते सरकारले घोषणा गरेको संविधान दिवसमा भाग नलिने, विरोध गर्ने र संविधानमा रहेका विभेदकारी एवं त्रुटिपूर्ण प्रावधान परिवर्तनका लागि दबाब दिने जनाएको छ ।
त्यसतै जनता समाजवादी पार्टी धनुषाले संविधान जारी भएको दिन असोज ३ गते विरोध प्रदर्शन र ब्लाक आउट गर्ने निर्णय गरेको छ ।
जसपा धनुषाका अध्यक्षद्वय प्रमोद यादब र पशुपति यादबले संयुक्त रुपमा विज्ञप्ती जारी गरेर विरोधका कार्यक्रम सार्वजनिक गरेका हुन् । असोज ३ गते जनकपुरको जनक चोकबाट दिउँसो ४ बजे विरोधी र्याली निकाल्ने र साँझ ६ः३० बजेदेखि ६ः४५ बजेसम्म १५ मिनेट ब्लाक आउट गर्ने विज्ञप्तीमा उल्लेख छ ।
विज्ञप्ती मार्फत विरोध कार्यक्रममा सहभागीताका लागि निर्वाचित जनप्रतिनिधि, केन्द्रिय, प्रदेश र जिल्लाका नेता तथा कार्यकर्ता, शुभेच्छुक, पत्रकार लगायतलाई अपिल समेत गरिएको छ ।
संविधानमा मधेसका मुद्दा सम्बोधन नगरेको भन्दै मधेसवादी दलले संविधान जारी भएकै दिनदेखि हरेक वर्ष ब्लाक आउट गर्दै आएको छ ।
Discussion about this post