महोत्तरीको सदरमुकाम जलेश्वरमा लाखौंको धनमाल चोरी

रञ्जन भण्डारी/महोत्तरी,/साउन १ गते ।जिल्ला सदरमुकाम जलेश्वरमा बिहीबार मध्यरातमा लाखौको चोरी भएको छ ।

जलेश्वर नगरपालिका २ टाउन प्लानिंग स्थित लक्ष्मी चण्डी मुरारका माध्यमिक विद्यालयका पुर्व शिक्षक कुल्दिप पाण्डेयको घरमा उक्त चोरी भएको हो ।

जेठो छोरा,बुहारी,नाती नातीनीसंगै घरमै सुतेका शिक्षक पाण्डेयको घरको पछाडी पटटीको ढोका फोडी चोर घरमै प्रवेश गरेर कान्छो छोरा कृष्ण कुमार पाण्डेयको कोठामा प्रवेश गरि दराज भित्र रहेका सम्पुर्ण गरगहना र नगद चोरेर मुख्य गेटबाटै भागेको हो । उक्त गरगहना र नगद गरि दश लाख बराबरको चोरी भएको हो ।

जिल्ला प्रहरी कार्यालय महोत्तरीका प्रवक्ता डिएसपी प्रकाश विष्टले चोरको खोजी भैरहेको र चाडै पक्राउ पर्नेमा आश्वस्त पारे । उनले पेशेवर चोरको काम हुन सक्ने भन्दै आफ्नो विशेष युनिट चोरको खोजीमा लगाएको वताए । विगत केहि समय पुर्व जलेश्वरमा विभिन्न चोरहरुलाई समातेर मुद्दा चलाएपछि चोरीमा कमि आएपनि यस चोरीले भने प्रहरी अझै सतर्क भएको र यस क्षेत्रमा रहेका चोरहरुका थप गिरोहहरुको खोजीमा तिव्रता ल्याएको उनले बताए ।

यता सदरमुकाम समेत सुरक्षित नभएपछि प्रहरीमाथि भने स्थानियहरुले कसरी भरोसा गर्ने भनेर प्रतिप्रश्न गरेका छन । श्रीमति सहित काठमाडौं वस्दै आएका गहना चोरिएका कृष्ण पाण्डेयले बुवाको मोबाईल र टर्च समेत चोरले लगेकोमा विहिवार साझसम्म समेत मोबाईलमा फोन लागिरहेको तर कसैले फोन नउठाएकोमा दिनभरिको समय हुदा समेत उक्त मोबाईल प्रहरीले ट्रेस गर्न नसक्नु दुःखद भएको बताए । उनले हालसम्म कमाएको सवै सम्पति चोरिएपछि कसरी जलेश्वर सुरक्षित रहेको भनेर बुझ्ने बताए ।

पाण्डेयले जलेश्वरको विभिन्न स्थानमा लागु औषध सेवनकर्ताहरु छ्याप्छ्याप्ती रहेकोले प्रहरीले तिनीहरुलाई समेत नियन्त्रण गर्न सके अधिकांश सम्भावित चोरीका घटनाहरु रोकिने थपे ।