चाडपर्वलाई लक्षित गर्दै धनुषाका ६ स्थानमा यात्रु सहायता कक्ष र रिफ्रेस सेन्टर स्थापना

जनकपुरधाम/असोज २५ गते। नजिकिँदै गरेको चाडपर्वका बेला सवारीसाधनको चाप बढ्ने अवस्थालाई मध्यनजर गर्दै यात्रुहरूको सुरक्षा तथा सहज आवागमनका लागि धनुषा जिल्लाका विभिन्न ६ स्थानमा यात्रु सहायता कक्ष स्थापना गरिएको छ।

चाडपर्वका समयमा यात्रुहरूले भोग्नुपर्ने टिकट तथा भाडासम्बन्धी गुनासो, यात्राका क्रममा हुन सक्ने ठगी, दुर्व्यवहार तथा अन्य समस्याको समाधानमा सहजीकरण गर्ने उद्देश्यले यात्रु सहायता कक्ष स्थापना गरिएको हो।

जिल्ला प्रहरी कार्यालय धनुषा र जिल्ला ट्राफिक प्रहरी कार्यालय, जिरोमाइल धनुषाको समन्वयमा जनकपुर बसपार्क, रमानन्द चोक, मुजेलिया, ढल्केबर, लालगढ र पोर्ताहासहित जिल्लाका ६ स्थानमा यात्रु सहायता कक्ष स्थापना गरिएको छ।

यात्रु सहायता कक्षमार्फत यात्राका क्रममा टिकट नपाउने, तोकिएभन्दा बढी भाडा लिने, टिकट तथा भाडासम्बन्धी अन्य गुनासा, ठगी र

दुर्व्यवहारलगायतका समस्या समाधानमा सहजीकरण गरिनेछ। साथै, यात्राका क्रममा हराएका सरसामानको खोजतलास तथा आकस्मिक सुरक्षा समस्यामा समेत आवश्यक सहयोग उपलब्ध गराउने व्यवस्था गरिएको छ।

यसैगरी, यात्रुहरूलाई यात्राका क्रममा आराम गर्न तथा आधारभूत सुविधा उपलब्ध गराउने उद्देश्यले जिल्ला प्रहरी कार्यालय धनुषा र जिल्ला ट्राफिक प्रहरी कार्यालय जिरोमाइल धनुषाको अगाडि शुद्ध खानेपानी र शौचालयको सुविधासहितको रिफ्रेस सेन्टर (Refresh Center) समेत स्थापना गरिएको छ।

चाडपर्वको समयमा घर फर्किने तथा विभिन्न गन्तव्यमा जाने यात्रुहरूको संख्या बढ्ने भएकाले यात्रुलाई सुरक्षित, सहज र व्यवस्थित यात्रा गर्न सहयोग पुर्‍याउने उद्देश्यले यस्तो व्यवस्था गरिएको हो।

प्रहरीले यात्राका क्रममा कुनै समस्या परेमा नजिकको प्रहरी कार्यालय वा यात्रु सहायता कक्षमा सम्पर्क गर्न अनुरोध गरेको छ। साथै, आकस्मिक अवस्था वा सुरक्षासम्बन्धी समस्या परेमा नेपाल प्रहरीको टोल फ्री नम्बर १०० तथा ट्राफिक प्रहरीको टोल फ्री नम्बर १०३ मा सम्पर्क गर्न आग्रह गरिएको छ।

यात्रु सहायता कक्ष र रिफ्रेस सेन्टरको उपयोग गरी सुरक्षित यात्रा गर्न तथा टिकट र भाडासम्बन्धी समस्या वा कुनै पनि प्रकारको दुर्व्यवहार भएमा सम्बन्धित निकायमा जानकारी गराउन यात्रुहरूलाई अनुरोध गरिएको छ।