बारा/असोज २५ गते। बाराको सिम्रौनगढमा मोटरसाइकलको ठक्करबाट एक महिलाको ज्यान गएको छ भने उनका श्रीमानसहित तीन जना घाइते भएका छन्।
शनिबार साँझ सिम्रौनगढ नगरपालिका–९ बसवरियास्थित नहर सडकमा भएको दुर्घटनामा सिम्रौनगढ नगरपालिका–६ निवासी ३७ वर्षीया रिजवना खातुनको मृत्यु भएको हो।
प्रहरीका अनुसार साँझ पौने ७ बजे सिम्रौनगढबाट कचोर्वातर्फ जाँदै गरेको भारतीय नम्बर प्लेटको बीआर ०५ एएफ ०१४० नम्बरको मोटरसाइकलले सोही दिशामा गुडिरहेको साइकललाई पछाडिबाट ठक्कर दिएको थियो।
दुर्घटनामा साइकल चालक ४० वर्षीय सबु मोहम्द र उनकी श्रीमती रिजवना घाइते भएका थिए। उपचारका लागि प्रादेशिक अस्पताल कलैया पुर्याइएकी रिजवनालाई चिकित्सकले साँझ सवा ७ बजे मृत घोषणा गरेका थिए। टाउको र निधारमा चोट लागेका सबुको कलैयामा प्रारम्भिक उपचारपछि राति सवा ९ बजे थप उपचारका लागि वीरगन्जस्थित नारायणी न्युरो अस्पताल पठाइएको प्रहरीले जनाएको छ।
दुर्घटनामा मोटरसाइकल चालक २५ वर्षीय अजय महतो र पछाडि सवार २२ वर्षीय विवेक महतोसमेत घाइते भएका छन्। दुवैको टाउको, नाक र कानमा चोट लागेको र अवस्था गम्भीर रहेको प्रहरीले जनाएको छ। उनीहरूलाई पनि थप उपचारका लागि नारायणी न्युरो अस्पताल पठाइएको छ।
घटनापछि प्रहरी चौकी कचोर्वा र इलाका प्रहरी कार्यालय सिम्रौनगढबाट प्रहरी टोली खटिएको थियो। दुर्घटनामा संलग्न मोटरसाइकल र साइकल प्रहरीको नियन्त्रणमा रहेको जिल्ला प्रहरी कार्यालय बाराले जनाएको छ।
Discussion about this post