मुम्बई/असोज ७ गते। नितेश तिवारीको बहुप्रतिक्षित चलचित्र ‘रामायण’ दुई भागमा बन्ने भव्य चलचित्रको रूपमा तयार हुँदैछ। यसका लागि निर्माताहरूले भारतीय र अन्तर्राष्ट्रिय दर्शकहरूका लागि छुट्टाछुट्टै संस्करणहरू तयार पारिरहेका छन्। प्राप्त जानकारी अनुसार चलचित्रको अंग्रेजी (अन्तर्राष्ट्रिय) संस्करण हिन्दी संस्करणको तुलनामा करिब ३० मिनेट छोटो हुनेछ।
एक स्रोतका अनुसार, “अन्तर्राष्ट्रिय संस्करणमा कुनै पनि गीतहरू समावेश गरिने छैनन् र विदेशी दर्शकहरूको रुचिलाई ध्यानमा राख्दै केही दृश्यहरू पनि छोट्याइनेछन्। भारतीय दर्शकहरू गीत-संगीतसहित तीन घण्टाभन्दा लामो चलचित्र हेर्न अभ्यस्त भए पनि विश्वव्यापी दर्शकहरूका हकमा यो लागू हुँदैन, त्यसैले निर्माताहरूले यस्तो निर्णय लिएका हुन्।”
यस चलचित्रका गीतहरूले मूल कथालाई अघि नबढाउने तर भारतीय दर्शकका लागि प्रस्तुतिलाई आकर्षक बनाउने उद्देश्य मात्र राख्ने बताइएको छ। भारतीय भाषाहरूमा भने यस महाकाव्यमा आधारित गीतहरू भव्य रूपमा सार्वजनिक गरिनेछन्। ‘रामायण: भाग १’ अमेरिका लगायतका देशहरूमा ६ नोभेम्बर २०२६ मा रिलिज हुनेछ भने भारतमा दीपावलीको अवसर पारेर ८ नोभेम्बर २०२६ मा प्रदर्शन तय गरिएको छ।
यसअघिको एक अन्तर्वार्तामा अभिनेता रणवीर कपुरले यस परियोजनाको स्तरलाई पिटर ज्याक्सनको ‘द लर्ड अफ द रिङ्स’ सँग तुलना गरेका थिए। दुई भागमा विभाजित यस महागाथामा करिब ६ घण्टा लामो भव्य दृश्य र एक्सन समावेश छन्, जसमा परिवार, कर्तव्य, प्रेम र असत्यमाथि सत्यको विजय जस्ता विषयवस्तुहरू समेटिएका छन्।
नमित मल्होत्रा र यशको ‘मोन्स्टर माइन्ड क्रिएशन्स’ द्वारा निर्मित यस चलचित्रमा अस्कर विजेता संगीतकारहरू हान्स जिमर र ए. आर. रहमानले संगीतमा सहकार्य गरेका छन्। चलचित्रका मुख्य कलाकारहरूमा भगवान रामका रूपमा रणवीर कपुर, सीतामा साई पल्लवी, लक्ष्मणमा रवि दुबे, रावणमा यश, हनुमानमा सनी देओल देखिने छन् ।
अन्तर्राष्ट्रिय स्तरमा प्रदर्शन गर्ने रणनीतिले यसको सांस्कृतिक मर्मलाई कायमै राख्दै कथालाई विश्वव्यापी दर्शकमाझ पुर्याउने निर्माताहरूको महत्त्वाकांक्षालाई झल्काउँछ। चलचित्रको दोस्रो भाग सन् २०२७ को दीपावलीमा रिलिज गर्ने योजना रहे पनि निश्चित मिति भने सार्वजनिक गरिएको छैन।
Discussion about this post