कन्नड स्टार यशको ‘टक्सिक’ले १०० करोडको ओपनिङ गर्ने प्रक्षेपण

काठमाडौं/भदौं ९ गते। कन्नड एक्टर यशको चलचित्र ‘टक्सिक’ भोलि अर्थात अगस्ट २६ मा सिनेमाघरहरूमा प्रदर्शन हुँदैछ।

देशभर यस चलचित्रको माग यति उच्च छ कि निर्माताहरूले कन्नड भाषी क्षेत्र बाहिर पनि बिहान ६ बजेको शोहरू समेत राख्दैछन्। अग्रिम बुकिङको कुरा गर्दा ‘टक्सिक’ ले ४० करोड रुपैयाँभन्दा बढीको टिकट बिक्री गरिसकेको छ।

स्याकनिल्कको तथ्याङ्क अनुसार  ‘टक्सिक’ को कन्नड संस्करणका लागि ३ लाख २० हजार टिकट बिक्री भएका छन्, जसबाट करिब १४ करोड रुपैयाँको कमाइ भएको छ। तेलुगु संस्करणमा भने ११ हजार २ सय टिकट बिक्रीबाट २९ लाख १० हजार रुपैयाँको कमाइ भएको छ। यो आँकडा अझ बढी हुन सक्थ्यो, तर आन्ध्र प्रदेशमा फिल्मको अग्रिम बुकिङ पूर्ण रूपमा खुलेको छैन । त्यहाँ रवि तेजाको फिल्म ‘इरुमुडी’ का कारण यशले स्क्रिन बाँडफाँड सम्बन्धी चुनौतीहरूको सामना गरिरहेका छन्।

यद्यपि, तमिल भाषामा ‘टक्सिक’ को राम्रो माग रहेको छ। यस चलचित्रले त्यहाँ ७५,३०० टिकट बिक्री गरेर १.१ करोड रुपैयाँ कमाएको छ। यसको मलयालम संस्करणले १८,४०० टिकट बिक्रीबाट ३४.३ लाख रुपैयाँ संकलन गरेको छ।

हिजोसम्म को कन्नड संस्करणले अग्रिम बुकिङमा सबैभन्दा बढी आम्दानी गरेको थियो तर आज हिन्दी संस्करणले यसलाई उछिनेको छ। यो समाचार तयार पार्दासम्म, यशको चलचित्रको हिन्दी संस्करणका लागि ४ लाख ८० हजार टिकट बिक्री भइसकेका छन् र यसबाट करिब १६.५ करोड रुपैयाँ आम्दानी भएको छ। समग्र अग्रिम बुकिङको कुरा गर्दा ‘टक्सिक’ ले ९ लाख १० हजार टिकट बिक्री गरेर ३२ करोड ४० लाख रुपैयाँको कमाइ गरेको छ।

यदि ब्लक गरिएका आरक्षित सिटहरूलाई पनि जोड्ने हो भने यो आँकडा बढेर ४१ करोड ५२ लाख रुपैयाँ पुग्छ। अग्रिम बुकिङका लागि अझै एक पूरै दिन बाँकी रहँदै यो नतिजा हासिल भएको हो। यदि यही गति कायम रहेमा अग्रिम बुकिङ बन्द हुँदासम्म चलचित्रको कुल बिक्री ५० करोड रुपैयाँसम्म पुग्न सक्छ।

‘टक्सिक’को अग्रिम बुकिङले शाहरुख खानको करियरका दुई सबैभन्दा ठूला चलचित्रहरूको रेकर्ड तोडेको छ। सन् २०२३ मा रिलिज भएको ‘पठान’ले प्रि सेल्समा १० लाख टिकट बिक्रीबाट ३२.०१ करोड रुपैयाँ कमाएको थियो भने ‘जवान’ले १५.७ लाख टिकट बिक्री गरेर ४०.७५ करोड रुपैयाँ संकलन गरेको थियो।

‘टक्सिक’ले कम टिकट बिक्री भए तापनि यी दुवै चलचित्रभन्दा बढी आम्दानी गरिसकेको छ। भोलि ‘स्पट बुकिङ’ अर्थात चलचित्र प्रदर्शनकै दिन गरिने बुकिङमा पनि उल्लेख्य संख्या देखिने अपेक्षा गरिएको छ। यसैका आधारमा व्यापार विज्ञहरूले यो चलचित्रले सजिलै १०० करोड रुपैयाँभन्दा बढीको ओपनिङ गर्ने अनुमान गरेका छन्।