सिरहा/साउन ८ गते। गुडिरहेको मोटरसाइकलको पछाडि उभिएर भिडियो बनाएको दृश्य सामाजिक सञ्जालमा भाइरल भएपछि राष्ट्रिय स्वतन्त्र पार्टी (रास्वपा) का सांसद बब्लु गुप्तालाई ट्राफिक प्रहरीले ५ सय रुपैयाँ जरिबाना गरेको छ।
सिरहा–१ बाट प्रतिनिधिसभामा निर्वाचित सांसद गुप्ता आफैं जिल्ला ट्राफिक प्रहरी कार्यालय, लहान पुगेर ट्राफिक नियम उल्लंघनबापतको जरिबाना तिरेका हुन्।
सार्वजनिक पदमा रहेका व्यक्तिले ट्राफिक नियम उल्लंघन गरेको भन्दै सामाजिक सञ्जालमा उनको व्यापक आलोचना भएको थियो। भिडियो सार्वजनिक भएपछि सर्वसाधारणले सांसदले नै कानुन पालना गर्नुपर्ने भन्दै टिप्पणी गरेका थिए।
घटनापछि सांसद गुप्ताले सामाजिक सञ्जालमार्फत आफ्नो गल्ती स्वीकार गर्दै सार्वजनिक रूपमा क्षमायाचना गरेका छन्। उनले रमाइलोका क्रममा ट्राफिक नियम उल्लंघन भएको स्वीकार गर्दै यसबाट गलत सन्देश गएको भन्दै दुःख व्यक्त गरेका छन्।
साथै, आगामी दिनमा ट्राफिक नियमको पूर्ण पालना गर्ने र यस्ता गल्ती दोहोरिन नदिने प्रतिबद्धता पनि उनले व्यक्त गरेका छन्।
Discussion about this post