दुवईको ‘लक्की ड्र’ किनेका दुई भारतीय बने एकैपटक करोडपति, जीते १५-१५ करोड

दुबई/असार १९ गते। केरलाका दुई व्यक्तिहरू—कबिर पुवाथिङ्गल र मोहम्मद शिबिल थय्यिल—ले संयुक्त अरब इमिरेट्सको ‘दुबई ड्युटी फ्री मिलेनियम मिलियनेयर’ मा जनही १० लाख डलर अर्थात १५ करोड नेपाली रूपैयाँ बराबरको चिट्ठा जितेका छन ।

यस जितसँगै उनीहरू दुवैजना दुवईको सबैभन्दा लोकप्रिय लक्की ड्र योजनामा ​​पुरस्कार जित्ने भारतीयहरूको सूचीमा सामेल भएका छन्। उनीहरू दुवैले यस जितलाई आफ्नो जीवन परिवर्तन गर्ने खालको अनुभवका रूपमा वर्णन गरेका छन्।

गल्फ न्युजको रिपोर्ट अनुसार अबु धाबीका बासिन्दा तथा ४८ वर्षीय उड्डयन सञ्चालक कबीर पुवाथिङ्गल र शारजाह एयरपोर्ट इन्टरनेसनल फ्री जोनमा सेल्स एक्जुकेटिभका रूपमा कार्यरत ३० वर्षीय मोहम्मद शिबिल थय्यिल भाग्यशाली विजेता बनेका हुन्। विगत २२ वर्षदेखि संयुक्त अरब इमिरेट्समा बस्दै आएका पुवाथिङ्गलले टिकट नम्बर ३४७१ मार्फत ‘मिलेनियम मिलियनेयर सिरिज ५४७’ जितेका हुन् । उनले उक्त टिकट गत जुन १३ मा अनलाइनमार्फत खरिद गरेका थिए।

पाँच सन्तानका पिता पुवाथिङ्गल विगत १२ वर्षदेखि दुबई ड्युटी फ्रीको प्रवर्द्धन कार्यक्रममा निरन्तर सहभागी हुँदै आएका थिए। उनले आफ्नो यस जितको श्रेय लामो समयको निरन्तर प्रयासलाई दिएका छन । उनले भने, ‘यस अवसरका लागि दुबई ड्युटी फ्रीलाई धन्यवाद। यो जीवन बदल्ने खालको अनुभव हो। म सबैलाई यस अवसरको सदुपयोग गर्न आग्रह गर्दछु।’

केरलकै बासिन्दा मोहम्मद शिबिल थायिल पनि विजेता बनेका छन्। शिबिलले ४८३२ नम्बरको टिकटमार्फत ‘मिलेनियम मिलियनेयर सिरिज ५४८’ जितेका हुन्, उनले उक्त टिकट १८ जुनमा अनलाइनमार्फत खरिद गरेका थिए। थायिल अक्टोबर २०२५ मा दुबई आएका थिए र हाल उनी शारजाह एयरपोर्ट इन्टरनेसनल फ्री जोनमा सेल्स विभागमा कार्यरत छन्। यो जितले उनलाई दोब्बर खुसी दिलाएको छ किनकि उनको विवाह भएको भर्खरै एक महिना मात्र भएको थियो ।

जितपछि शिबिलले बताए कि यस प्रवर्द्धनात्मक योजनाअन्तर्गत केवल दोस्रो टिकट किन्दा नै आफू करोडपति बनेको थाहा पाउँदा उनी आश्चर्यचकित भए। उनले भने, ‘तपाईंहरूले मेरो जीवन नै बदलिदिनुभयो, यो अहिलेसम्मकै सबैभन्दा खुसीको खबर हो। दुबई ड्युटी फ्रीलाई धेरै धेरै धन्यवाद। म निकै आभारी छु।’
खलीज टाइम्सका अनुसार सन् १९९९ मा सुरु भएको ‘दुबई ड्युटी फ्री मिलेनियम मिलियनेर’ प्रवर्द्धन कार्यक्रमअन्तर्गत पुरस्कार जित्ने केरलाका यी दुई व्यक्ति क्रमशः २७८औँ र २७९औँ भारतीय नागरिक हुन्। लामो समयदेखि सञ्चालनमा रहेको यस ‘लक्की ड्र’ मा टिकट खरिद गर्नेहरूमध्ये भारतीय नागरिकहरूको समूह सबैभन्दा ठूलो रहेको छ।

मिलेनियम मिलियनेयर लक्की ड्र’ पछि अर्का एक भारतीय आप्रवासी कौशल वेदले ‘फाइनेस्ट सरप्राइज’ रफलमा मर्सिडिज बेन्ज एस ५००जितेका छन्। सोही ड्र अन्तर्गत कुवेतमा बसोबास गर्ने क्यानडाली नागरिक महमुद हरिसीले पनि ‘फाइनेस्ट सरप्राइज’ प्रवर्द्धन कार्यक्रममा अप्रिलिया आरएसभी ४ १२०० सुपरबाइक जितेका छन्।