धनुषा/जेठ २८ गते । मधेश प्रदेश सरकारले आगामी आर्थिक वर्ष २०८३/८४ का लागि प्रस्तुत गरेको नीति तथा कार्यक्रम प्रदेशसभाबाट सर्वसम्मत रूपमा पारित भएको छ।
बिहीबार बसेको प्रदेशसभा बैठकमा नीति तथा कार्यक्रममाथि दर्ता भएका संशोधन प्रस्तावहरूमाथि विस्तृत छलफल सम्पन्न भएपछि सभामुख रामआशिष यादवले निर्णयार्थ प्रस्ताव पेश गरेका थिए। प्रस्तावको विपक्षमा कुनै मत नपरेपछि सभामुख यादवले नीति तथा कार्यक्रम सर्वसम्मत रूपमा स्वीकृत भएको घोषणा गरे।
गत जेठ १५ गते प्रदेश सरकारले सार्वजनिक गरेको नीति तथा कार्यक्रम प्रतिपक्षी दलहरूको अवरोधका कारण लामो समयसम्म छलफलमा जान सकेको थिएन। पछिल्ला दिनहरूमा दलहरूबीच सहमति बनेपछि संशोधन प्रस्तावमाथिको छलफल अघि बढाइएको थियो।
छलफलका क्रममा विभिन्न सांसदहरूले संशोधन प्रस्ताव दर्ता गराएका थिए। तीमध्ये सत्तारुढ नेकपा एमालेका सांसद राजकुमार लेखीद्वारा प्रस्तुत संशोधन प्रस्ताव स्वीकृत भएको छ भने अन्य प्रस्तावहरू अस्वीकृत भएका छन्।
नीति तथा कार्यक्रम पारित भएसँगै अर्थमन्त्री युवराज भट्टराईले आगामी आर्थिक वर्षको बजेट तयारीका लागि आवश्यक विनियोजन विधेयकका सिद्धान्त तथा प्राथमिकता प्रदेशसभामा प्रस्तुत गरेका छन्।
प्रदेशसभा सचिवालयका अनुसार शुक्रबार बस्ने बैठकमा विनियोजन विधेयकका सिद्धान्त र प्राथमिकतामाथि छलफल गरिनेछ। उक्त छलफलपछि आगामी आर्थिक वर्षको बजेट निर्माण प्रक्रियाले थप गति लिने अपेक्षा गरिएको छ।
Discussion about this post