संवैधानिक नियुक्तिको विरोध गर्दै विपक्षी दलद्वारा मधेस प्रदेशसभा बैठक अवरुद्ध

धनुषा/जेठ १९ गते। मधेश प्रदेशसभाको बैठक मंगलबार विपक्षी दलहरूले अवरुद्ध गरेका छन् । प्रदेश लोकसेवा आयोग र जनलोकपाल आयोगमा गरिएको सदस्य नियुक्ति प्रक्रिया अवैधानिक भएको आरोप लगाउँदै विपक्षी सांसदहरूले बैठक चल्न दिएनन् ।

बैठक सुरु हुनासाथ प्रमुख प्रतिपक्षी दल जनता समाजवादी पार्टी नेपाल, जनमत पार्टी र राष्ट्रिय प्रजातन्त्र पार्टीका प्रदेशसभा सदस्यहरू आ–आफ्नो स्थानबाट उठेर विरोध जनाएका थिए । सभामुख रामआशिष यादवले नीति तथा कार्यक्रममाथिको छलफलकालागि बैठक सञ्चालन गर्न पटक–पटक आग्रह गरेपनि विपक्षी सांसदहरू विरोधमा उभिएप्छि बैठक स्थगित गरिएको थियो ।

विपक्षी दलहरूले मुख्यमन्त्री कृष्णप्रसाद यादवले विधि र प्रक्रिया मिचेर एकलौटी ढंगले लोकसेवा आयोग र जनलोकपाल आयोगमा सदस्य नियुक्त गरेको आरोप लगाएका छन् ।

विपक्षी दलका तर्फबाट बोल्दै संजय कुमार यादवले संवैधानिक निकायमा गरिएको नियुक्ति अवैध भएकाले त्यसलाई खारेज गर्नुपर्ने माग गरे । उनले मुख्यमन्त्रीले सार्वजनिक रूपमा माफी नमागेसम्म बैठक सञ्चालन हुन नदिने चेतावनी पनि दिए ।
मधेश प्रदेश सरकारको आर्थिक वर्ष २०८३÷०८४ को नीति तथा कार्यक्रममाथि सोमबारदेखि जारी छलफल पूरा हुन नसकेपछि मंगलबार पुनः बैठक बोलाइएको थियो । कार्यसूचीअनुसार मंगलबार पनि नीति तथा कार्यक्रममाथि छलफल हुने तय गरिएको थियो ।