धनुषा/जेठ १५ गते । नेपाल पत्रकार महासंघ मधेश प्रदेश समितिको आफ्नै भवन निर्माण कार्य औपचारिक रूपमा सुरु गरिएको छ । जनकपुरधाम उपमहानगरपालिका–४ स्थित महासंघको स्वामित्वमा रहेको जग्गामा आयोजित कार्यक्रमबीच भवनको शिलान्यास गरिएको हो ।
मधेश प्रदेशका गृह, सञ्चार तथा कानून मन्त्री फकिरा महतोले पूजा अर्चनासहित भवनको शिलान्यास गरेका हुन् । कार्यक्रममा बोल्दै मन्त्री महतोले पत्रकार महासंघको भवन निर्माण कार्य सम्पन्न गर्न प्रदेश सरकारबाट आवश्यक सहयोग उपलब्ध गराइने प्रतिबद्धता व्यक्त गरे ।
उनले प्रदेश सरकारले यसअघि नै भवन निर्माणका लागि २० लाख रुपैयाँ बजेट विनियोजन गरिसकेको जानकारी दिँदै आगामी बजेटमा पनि आवश्यक रकम समावेश गरिने बताए । सञ्चार क्षेत्रको विकास र पत्रकारहरूको संस्थागत सुदृढीकरणप्रति सरकार सकारात्मक रहेको उनको भनाइ थियो । महासंघका अनुसार भवन निर्माणका लागि गुठी संस्थानबाट ४ कठ्ठा जग्गा लिजमा प्राप्त गरिएको छ । जनकपुरधाम–४ स्थित तैनाथी गुठीको उक्त जग्गामा अब महासंघको आफ्नै भवन निर्माण हुने भएको हो ।
शिलान्यास कार्यक्रममा मधेश प्रदेशका आठवटै जिल्लाबाट सञ्चारकर्मीहरूको सहभागिता रहेको थियो । सहभागी पत्रकारहरूले आफ्नै भवन निर्माण सुरु हुनु महासंघका लागि ऐतिहासिक उपलब्धि भएको बताएका थिए ।
Discussion about this post