जनसंख्याको आधारमा बजेट दिन मधेस सरकारको माग

धनुषा/जेठ १२ गते । मधेस प्रदेशका स्वास्थ्य तथा जनसंख्या मन्त्री जंगीलाल रायले संघीय सरकारसँग जनसंख्याको अनुपातमा बजेट विनियोजन गर्न माग गरेका छन् । नेपाल सरकारको स्वास्थ्य तथा खाद्य स्वच्छता मन्त्रालयद्वारा आयोजित राष्ट्रिय जनसंख्या नीति सार्वजनिकीकरण तथा अभिमुखीकरण कार्यक्रममा बोल्दै मन्त्री रायले जनसंख्या देशको विकाससँग प्रत्यक्ष जोडिएको विषय भएकाले त्यसअनुसार स्रोत र बजेट सुनिश्चित गर्नुपर्ने बताएका हुन् ।

उनले देशभर जनसंख्याको असन्तुलन बढिरहेका बेला मधेसमा जनसंख्या वृद्धि दर उच्च रहेको उल्लेख गर्दै प्रदेशको आवश्यकता अनुसार योजना र बजेट ल्याउन आग्रह गरे । मन्त्री रायले जनसंख्या नै विकासको प्रमुख आधार भएको उल्लेख गर्दै स्रोत–साधनको उपलब्धता पनि जनसंख्याको अनुपातमा हुनुपर्ने धारणा राखे ।

कार्यक्रममा मधेस प्रदेश स्वास्थ्य तथा जनसंख्या मन्त्रालयका सचिव प्रमोद यादवले पनि जनसंख्याको तुलनामा पर्याप्त बजेट नपाउँदा मधेस धेरै सूचकमा पछाडि परेको बताए । उनका अनुसार देशको कुल जनसंख्याको झण्डै एक तिहाइ हिस्सा मधेसमा रहेको छ । नवजात शिशु, किशोर–किशोरी तथा प्रजनन उमेर समूहको जनसंख्या पनि ठूलो संख्यामा मधेसमै केन्द्रित रहेको उनले बताए ।

सचिव यादवले मधेसमा देशको महत्वपूर्ण जनशक्ति रहेको उल्लेख गर्दै संघ, प्रदेश र स्थानीय तहले समन्वय गरेर जनसंख्याअनुसार नीति तथा कार्यक्रम अघि बढाउनुपर्नेमा जोड दिए । उनले मधेस सरकारले आफ्नै स्वास्थ्य नीति ल्याउने तयारीसमेत भइरहेको जानकारी दिए । कार्यक्रममा देशभर बढ्दो जनसंख्या असन्तुलन, त्यसबाट उत्पन्न चुनौती तथा समाधानका उपायबारे छलफल गरिएको थियो ।