धनुषा–३ मा मनिष झाको घरदैलो तीव्र, विकास र सुशासन मुख्य एजेन्डा

धनुषा/फागुन १४ गते । धनुषा निर्वाचन क्षेत्र नम्बर–३ मा प्रतिनिधि सभा सदस्य पदका उम्मेदवार मनिष झा ले आफ्नो चुनावी अभियानलाई तीव्रता दिएका छन् । राष्ट्रिय स्वतन्त्र पार्टी (रास्वपा) का तर्फबाट उम्मेदवारी दिएका झाले विकास, सुशासन र पारदर्शितालाई मुख्य एजेन्डा बनाउँदै मतदातामाझ सक्रिय रूपमा पुगिरहेका छन् ।

बिहीबार नगराइन नगरपालिका–अकौरामा घरदैलो कार्यक्रम सञ्चालन गर्दै उम्मेदवार झाले स्थानीय बासिन्दासँग प्रत्यक्ष संवाद गरेका थिए । घरदैलोका क्रममा उनले खानेपानी अभाव, ढल व्यवस्थापनको कमजोरी, सडक स्तरोन्नतिको आवश्यकता, बेरोजगारी तथा बढ्दो युवापलायन जस्ता समस्याहरूबारे आफू पूर्ण रूपमा जानकार रहेको बताएका छन् ।

उम्मेदवार झाले स्थानीय समस्याको दीर्घकालीन समाधानका लागि स्पष्ट योजना रहेको उल्लेख गर्दै भने, “खानेपानी र ढल व्यवस्थापन जस्ता आधारभूत सेवामा सुधार ल्याउन समन्वयात्मक पहल गरिनेछ । सडक पूर्वाधारलाई प्राथमिकतामा राखेर स्तरोन्नति गरिनेछ । युवाहरूका लागि रोजगारी र उद्यमशीलताका अवसर सिर्जना गर्नु मेरो प्रतिबद्धता हो ।”

उनले सुशासन र पारदर्शितालाई आफ्नो अभियानको केन्द्रमा राख्दै सार्वजनिक खर्चको प्रभावकारिता, सेवा प्रवाहमा सुधार तथा भ्रष्टाचार नियन्त्रणमा कडा कदम चाल्ने बताएका छन् । “राजनीतिलाई विश्वासयोग्य बनाउँदै नागरिकको दैनिक जीवनसँग जोडिएका मुद्दामा परिणाममुखी काम गर्ने लक्ष्य लिएको छु,” उनले थपे ।

घरदैलो कार्यक्रममा स्थानीय बासिन्दाले खानेपानी वितरणमा अनियमितता, वर्षायाममा ढल निकासको समस्या, जीर्ण सडक र रोजगारका सीमित अवसरबारे गुनासो राखेका थिए । मतदाताले विकास योजनाको कार्यान्वयन, शिक्षा–स्वास्थ्य सेवा सुदृढीकरण तथा कृषि क्षेत्रमा सहजीकरणको अपेक्षा व्यक्त गरेका छन् ।

रास्वपाका स्थानीय नेता तथा कार्यकर्ताहरूका अनुसार आगामी दिनहरूमा उम्मेदवार झाले क्षेत्रका विभिन्न वडामा भेटघाट, छलफल तथा अन्तरक्रिया कार्यक्रमलाई निरन्तरता दिनेछन् । पार्टीले मतदातामाझ सकारात्मक सन्देश पुर्‍याउन र एजेन्डामुखी अभियानलाई प्राथमिकता दिइएको जनाएको छ ।

धनुषा–३ मा उम्मेदवारहरूबीच चुनावी गतिविधि बढ्दै जाँदा मतदाताको चासो पनि तीव्र बनेको छ । विकास, सुशासन र रोजगारीका मुद्दा यस क्षेत्रको चुनावी बहसको केन्द्रमा देखिएका छन् ।