धनुषाको विदेहनगर–५ र शहिदनगर–७ मा उमाशंकर अरगरियाको घरदैलो सम्पन्न

धनुषा/फागुन ११ गते । धनुषा निर्वाचन क्षेत्र नं. २ अन्तर्गत विदेह नगरपालिका–५ मुडिवा र शहिदनगर नगरपालिका–७ धबौली र नेमुवाटोलमा नेकपा एमालेका उम्मेदवार उमाशंकर अरगरियाले घरदैलो कार्यक्रम सम्पन्न गरेका छन् ।

चुनावी माहोल तात्दै जाँदा अरगरियाले स्थानीय बस्ती, टोल तथा समुदायमा पुगेर मतदातासँग प्रत्यक्ष संवाद गरेका हुन् ।

घरदैलोका क्रममा उम्मेदवार अरगरियाले आफूलाई जनताले दिएको विश्वासलाई विकासमार्फत प्रतिफल दिने प्रतिबद्धता व्यक्त गरे ।

सडक, खानेपानी, शिक्षा र स्वास्थ्य सेवाको पहुँच विस्तार आफ्नो मुख्य प्राथमिकता रहेको उनले बताए ।

‘स्थानीय समस्या स्थानीय तहबाटै समाधान हुनुपर्छ, त्यसका लागि नीति र स्रोत दुबै सुनिश्चित गरिनेछ,’ अरगरियाले मतदातामाझ भने ।

कार्यक्रममा पार्टीका स्थानीय नेता कार्यकर्ता, युवाहरू तथा महिला समूहको उल्लेख्य सहभागिता देखिएको थियो ।

सहभागीहरूले क्षेत्रको पूर्वाधार विकास, बेरोजगारी र कृषि क्षेत्रका समस्याबारे उम्मेदवारलाई ध्यानाकर्षण गराएका थिए ।