आचारसंहिताको पालना गर्दै निष्पक्ष रूपमा कलम चलाउन आवश्यक

धनुषा/फागुन ७ गते । राष्ट्रिय समाचार समिति (रासस) को ६५औँ वार्षिकोत्सवको अवसरमा आज जनकपुरधाममा निर्वाचन ‘आचारसंहितामा सञ्चार क्षेत्रको भूमिका’ विषयक अन्तरक्रिया कार्यक्रम सम्पन्न भएको छ ।

रासस मधेस प्रदेश कार्यालयद्वारा आयोजित उक्त कार्यक्रममा सहभागी वक्ताहरूले यसपटकको निर्वाचन विशेष एवं अत्यन्त महत्वपूर्ण भएकाले निर्वाचनलाई मर्यादित एवं निष्पक्ष गराउनुपर्ने बताउनुभयो । साथै उहाँहरुले निर्वाचनमा सहभागी भएका राजनीति दलका उम्मेदवारहरुप्रति कुनै भेद्भाव नराखी निष्पक्ष रुपमा कलम चलाउनुपर्नेमा जोड दिनुभयो । देशमा सबै वर्ग र समुदाय निर्वाचन अभियानमा जुटिसकेकाले निर्वाचनलाई शान्तिपूर्ण एवं भयरहित बनाउन सबैले आ–आफ्नो क्षेत्रबाट सहयोग गर्नुपर्नेमा वक्ताहरुले जोड दिए ।

कार्यक्रममा वक्ताहरूले निर्वाचनका बेला सञ्चारमाध्यमको जिम्मेवारी थप बढ्ने उल्लेख गर्दै आचारसंहिताको प्रभावकारी कार्यान्वयनमा पत्रकारिता क्षेत्रले निष्पक्ष, सत्य र तथ्यपरक समाचार सम्प्रेषण गर्नुपर्ने सुझाव दिए । उहाँहरूले निर्वाचन प्रक्रियालाई स्वच्छ, निष्पक्ष र पारदर्शी बनाउन सञ्चारमाध्यमले मतदातालाई सही सूचना प्रवाह गर्नुका साथै भ्रामक सूचना र दुष्प्रचार नियन्त्रणमा सक्रिय भूमिका खेल्नुपर्ने धारणा राख्नुभयो ।

राससको स्थापना, विकासक्रम तथा समाचार प्रवाहमा पु¥याएको योगदानबारे चर्चा गर्नुका साथै सहभागीले विश्वसनीय समाचार सम्प्रेषणमा राससले खेलेको भूमिकाको प्रशंसा गर्दै आगामी दिनमा अझ प्रभावकारी ढङ्गले सेवा प्रवाह गर्न सुझाव दिनुभयो ।

अन्तरक्रिया कार्यक्रममा धनुषाका मुख्य निर्वाचन अधिकृत सुभाषबाबु पुरीले निर्वाचन प्रक्रियालाई स्वच्छ, निष्पक्ष र विश्वसनीय बनाउन सञ्चार क्षेत्रको भूमिका अत्यन्त महत्वपूर्ण रहेको बताउनुभयो । उहाँले निर्वाचन आचारसंहिताको पूर्णपालना गराउँदै तथ्यमा आधारित, सन्तुलित र जिम्मेवार समाचार सम्प्रेषण गर्न सञ्चारमाध्यमलाई आग्रह गर्नुभयो । गलत सूचना, अफवाह र पक्षपातपूर्ण सामग्रीले निर्वाचन प्रक्रियामा नकारात्मक असर पार्ने उल्लेख गर्दै उहाँले सत्य, प्रमाणित र विश्वसनीय समाचार प्रकाशन÷प्रसारणमा जोड दिनुभयो ।

मुख्य निर्वाचन अधिकृत पुरीले निर्वाचन आचारसंहिताको प्रभावकारी कार्यान्वयनका लागि प्रशासन, सुरक्षा निकाय र सञ्चार क्षेत्रबीच समन्वय आवश्यक रहेको बताउनुभयो । कुनै पनि प्रकारका अवाञ्छित गतिविधि, गलत सूचना तथा अफवाह नियन्त्रण गर्न प्रशासन सतर्क रहेको उल्लेख गर्दै उहाँले सत्य र प्रमाणित सूचना मात्र सार्वजनिक गर्न सञ्चारकर्मीलाई आग्रह गर्नुभयो ।

धनुषाका प्रमुख जिल्ला अधिकारी प्रेमप्रसाद लुइँटेलले निर्वाचन अवधिभर कानुन कडाइका साथ पालना गरिने र शान्ति–सुरक्षा कायम राख्न आवश्यक सबै तयारी पूरा गरिएको जानकारी दिनुभयो । साथै उहाँले मतदातालाई निर्धक्क र सुरक्षित वातावरणमा मतदान गर्न आह्वान गर्नुभयो ।

जिल्ला प्रहरी कार्यालय धनुषा प्रमुख रुगमबहादुर कुँवरले निर्वाचनलाई ध्यानमा राखेर जिल्लाको शान्ति सुरक्षाको अवस्थालाई सुदृढ एवं प्रभावकारी बनाएको जानकारी दिँदै निर्वाचन निष्पक्ष एवं धाधलीरहित हुने भएकाले ढुक्क भएर मतदान गर्न सबैमा आग्रह गर्नुभयो । निर्वाचन आचारसंहिताबारे कार्यपत्र प्रस्तुत गर्दै निर्वाचन आचारसंहिता अनुगमन अधिकृत कृष्ण गैरेले निर्वाचन आचारसंहिता पालना भएको वा नभएको विषयमा निरन्तर अनुगमन भइरहेको र यस कार्यमा सहयोग गर्न पत्रकारहरुसँग आग्रह गर्नुभयो ।

नेपाल पत्रकार महासङ्घ धनुषा शाखाका अध्यक्ष पुरन साहले पत्रकारहरु निर्वाचन आचारसंहिताको विषयमा जिम्मेवारीका साथ भूमिका खेलिरहेको उल्लेख गर्दै पत्रकारहरुले उम्मेदवारहरुप्रति एकनाशको व्यवहार गर्नुपर्ने बताउनुभयो ।

रासस मधेस प्रदेश कार्यालयका प्रमुख सुरेश झाले कार्यक्रमको उद्देश्यबारे प्रकाश पार्दै वार्षिकोत्सवलाई केवल औपचारिकतामा सीमित नराखी समसामयिक विषयमा बहस र अन्तरक्रियामार्फत सञ्चार क्षेत्रलाई सशक्त बनाउने प्रयास गरिएको बताउनुभयो ।

राससकर्मीहरु नीरञ्जन साह, गोपाल बराल र अजय साह लगायत सञ्चारकर्मीहरु रासस एवं आचारसंहिताको विशषयमा आ–आफ्नो धारणा राख्नुभएको थियो  ।