मधेशमा दशैं–तिहार र छठका लागि १३ हजारभन्दा बढी सुरक्षाकर्मी परिचालन

जनकपुरधाम/असोज ११ गते। बडादसैँ, तिहार र छठ पर्वलाई लक्षित गर्दै मधेश प्रदेश प्रहरी कार्यालयले विशेष सुरक्षा योजना लागू गरेको छ।

जेन–जी आन्दोलनको आडमा आपराधिक गतिविधि बढ्ने सम्भावना र आन्दोलनकै क्रममा विभिन्न कारागारबाट भागेका कैदी अझै समातिन नसकेको कारण सुरक्षा जोखिम उच्च रहेको प्रहरीले जनाएको छ।

प्रदेश प्रहरी प्रमुख डीआईजी उमाप्रसाद चतुर्वेदीका अनुसार जेन–जी आन्दोलनको क्रममा १ हजार १ सय ४४ कैदीबन्दी कारागारबाट भागेका थिए। तीमध्ये ५ सय ९० जना अझै फिर्ता नभएको उनले जानकारी दिए।

विशेष योजनाअनुसार प्रदेशभर ६ हजार ५ सय ३२ नेपाल प्रहरी र ६ हजार ५ सय सशस्त्र प्रहरीसहित १३ हजारभन्दा बढी सुरक्षाकर्मी परिचालन गरिएको छ। चोरी, लुटपाट, गुण्डागर्दी र अन्य आपराधिक गतिविधि नियन्त्रणका लागि मोबाइल गस्ती, पेट्रोलिङ, सरप्राइज चेकिङदेखि सादा पोसाकमा समेत प्रहरी खटाइएको छ।

यस अवधिमा ४८ क्यूआरटी, १९ स्ट्राइकिङ टोली, ११६ ट्राफिक चेकपोस्ट, १२६ मोबाइल गस्ती, २१२ पैदल गस्ती, ३२५ पिकेट गस्ती र २६ राजमार्ग स्कर्टिङ सञ्चालन हुने प्रहरीको भनाइ छ। धनुषाका प्रहरी उपरीक्षक नहरी रेग्मीका अनुसार कुनै पनि घटनाको जानकारी भएमा १० मिनेटभित्र प्रहरी टोली घटनास्थलमा पुग्ने व्यवस्था गरिएको छ।

भारतसँगको खुला सीमाका कारण हतियार दुरुपयोग, चोरी, लुटपाट र सीमा अपराधको जोखिम उच्च हुने भएकाले सीसीटीभी क्यामेरा, शंकास्पद व्यक्तिको अनुगमन र सूचना संकलनलाई प्राथमिकता दिइएको छ। प्रहरीले जेन–जीको नाममा अपराध गर्ने जो कसैलाई पनि कडाभन्दा कडा कारबाही गरिने चेतावनी दिएको छ। साथै, कुनै आपराधिक गतिविधि देखे तत्काल १०० नम्बरमा खबर गर्न नागरिकलाई आग्रह गरिएको छ।

सशस्त्र प्रहरीका मधेश प्रदेश प्रवक्ता एसएसपी अशोक बमका अनुसार सशस्त्र प्रहरीले नेपाल प्रहरीसँग समन्वय गर्दै सीमा क्षेत्रमा पैदल गस्ती, चेकपोस्ट, मोबाइल टोली, विपद् उद्धार टोली सञ्चालन गर्ने र ७८ हेल्प डेस्कमार्फत सुरक्षा कडाइ गर्ने व्यवस्था गरिएको छ।

प्रकाशित मिति: २०८२ आश्विन ११, शनिबार १६:५१