गिरिजानन्द साह/जनकपुरधाम/साउन २१ गते। लैङ्गिक हिंसा विरुद्ध जनचेतना फैलाउने उद्देश्यले “सामाजिक रूपान्तरणका लागि व्यवहारमा बदलाव: लैङ्गिक न्यायको सवाल” विषयमा केन्द्रित सडक फोटो प्रदर्शनी तथा कचहरी कार्यक्रम जनकपुरधाममा सम्पन्न भएको छ।
कायापलटको आयोजनामा सम्पन्न भएको उक्त कार्यक्रम People in Need Nepal र DDRC Parsa को सहकार्य तथा UK in Nepal को आर्थिक सहयोगमा आयोजना गरिएको हो। राजदेवी मन्दिर उत्तर गेटमा आयोजना गरिएको उक्त कार्यक्रम साउन २१ गते साँझ ४ बजेदेखि ६ बजेसम्म सञ्चालन भएको हो। कार्यक्रममा महिला, बालबालिका तथा सामाजिक न्याय समिति, मधेस प्रदेशकी सदस्य माननीय किरण कुमारी, राष्ट्रिय मानव अधिकार आयोग, मधेस प्रदेशका सह-सचिव बुद्ध नारायण साहनी, नेपाल बार एसोसिएसनकी सदस्य अधिवक्ता रिंकु कुमारी यादव, तथा जिल्ला प्रहरी कार्यालय धनुषाको महिला, बालबालिका तथा जेष्ठ नागरिक सेवा केन्द्रकी प्रहरी निरीक्षक निकिता कुमारी मिश्र वक्ताको रूपमा सहभागी थिए।
कार्यक्रमको कचहरी संवाद खण्ड सञ्चारकर्मी रिंकु गायत्री मिश्रले सहजकर्ताको भूमिका निर्वाह गरेकी थिइन्। वक्ताहरूले लैङ्गिक हिंसा न्यूनीकरणका लागि कानुनी, सामाजिक तथा व्यवहारिक पक्षमा ध्यान दिनुपर्नेमा जोड दिएका थिए। कचहरी संवाद तथा फोटो प्रदर्शनीमार्फत समाजमा व्याप्त लैङ्गिक असमानता, हिंसा र विभेदका विविध पक्षबारे गहिरो चर्चा गरिएको थियो।
सडक फोटो प्रदर्शनीले समाजमा व्याप्त लैङ्गिक असमानता तथा हिंसाका विविध रूपमाथि दृष्टिगोचर गराउँदै उपस्थित सहभागीहरूमा चेतना अभिवृद्धि गरेको थियो। फोटो प्रदर्शनीमा विविध दृश्यचित्रहरूमार्फत लैङ्गिक हिंसाका प्रभाव, सामाजिक विभेद, महिला सशक्तीकरणका पक्षहरू प्रस्तुत गरिएको थियो। सडकको छेउमा खुला रूपमा राखिएका यी तस्वीरहरूले आम दर्शकहरूलाई गहिरो सन्देश दिएका थिए।
कार्यक्रममा स्थानीय समुदाय, विभिन्न संघ–संस्था, विद्यार्थी तथा सञ्चारकर्मीहरूको उल्लेखनीय उपस्थिति रहेको थियो।
Discussion about this post