मधेश प्रदेश : बेपत्ता भएको दुई दिनपछि मृत भेटिइन् किशोरी

कार्तिक १८ गते। पर्साको बहुदरमाई नगरपालिकामा एक जना किशोरीको शव बरामद भएको छ । ती किशोरी नगरपालिकाको वडा नम्बर– ८ रामनगरीबाट दुई दिनदेखि बेपत्ता रहेको प्रहरीले जनाएको छ ।

प्रहरी प्रवक्ता दीपक भारतीका अनुसार स्थानीय रामबाबु सहनीकी १७ वर्षीया छोरी निजीमा कुमारी सहनी मृत अवस्थामा भेटिएकी हुन् । उनका अनुसार रामनगरीस्थित बजारको पोखरीमा घोप्टो परेको अवस्थामा उनको शव भेटिएको हो । शनिबार दिउँसो पोखरीमा शव देखेपछि स्थानीयले प्रहरीलाई खबर गरेका थिए ।

त्यस लगत्तै प्रहरीको टोली घटनास्थलमा पुगेको जिल्ला प्रहरी कार्यालय पर्साले जनाएको छ । घटना भवितव्य हो वा हत्या ? त्यसबारे प्रहरी अनुसन्धान सुरु भएको जिल्ला प्रहरी कार्यालय पर्साले जनायो । मृत भेटिएकी सहनीको शव पोस्टमार्टमका लागी वीरगन्जको नारायणी अस्पतालमा पठाइएको प्रहरीले जानकारी दिएको छ ।