देशभर १० स्थानमा अडिसन गर्दै ‘मिस्टर नेपाल’,जनकपुरमा जुलाई ७ मा हुने

असार १९ गते। रियलमी ‘मिस्टर नेपाल २०२४’ को पहिलो चरण (छनौट चरण) को अडिसन झापाबाट सुरु हुने भएको छ । आयोजक नेक्स्ट मोडल्स नेपालले एक विज्ञप्ति जारी गर्दै जुलाई ५ अर्थात (असार २१ गते) झापाबाट प्रतियोगिताको अडिसन सुरु हुन लागेको जनाएको छ । आयोजक नेक्स्ट मोडल्सअनुसार दोस्रो अडिसन विराटनगर जुलाई ६, तेस्रो जनकपुरमा जुलाई ७, चौथो हेटौँडा जुलाई ८, पाँचौँ चितवन जुलाई ९, छैठाैँ बुटवल जुलाई १०, सातौँ नेपालगन्ज जुलाई ११, आठौँ धनगढी जुलाई १२, नवाैँ पोखरा जुलाई १३, दशौँ काठमाडौँ जुलाई २० मा आयोजना हुनेछ ।

१८ वर्षदेखि ३२ वर्ष ननाघेका युवाहरूले सहभागिता जनाउन सक्ने प्रतियोगिताको आवेदन ई सेवा तथा नेक्स्ट मोडल्स नेपालको कार्यालय वा सामाजिक सञ्जालबाट समेत प्राप्त गर्न सकिनेछ । देशभर छरिएर रहेका युवाहरूलाई सहभागिताको अवसर प्रदान गर्दै उत्कृष्ट प्रतिभा चयन गर्न देशभर अडिसन गर्न लागेको आयोजकको भनाई छ । प्रतियोगितामा विश्वका जुनै कुनामा रहेका ५ फिट ७ इन्च माथि उचाइ भएका नेपाली नागरिकले सहभागिता जनाउन सक्नेछन् । प्रतियोगिताको शीर्ष विजेताले ‘मिस्टर वर्ल्ड २०२४’ वा ‘मिस्टर ग्लोबल २०२४’ मा नेपालको प्रतिनिधित्वको अलावा नगद पुरस्कार र विभिन्न गिफ्ट समेत जित्न सक्नेछन् ।

प्रतियोगिताको छनौट चरणको अडिसनबाट छानिएका प्रतियोगीलाई मात्र अन्तिम प्रतिस्पर्धाको तयारी कक्षा स्विमिङ, फुटबल, रक क्लाइमिङ, समाजसेवा, सर्ट हाइकिङ, क्याटवाक, व्यक्तित्व विकास, पब्लिक स्पिकिङलगायतका दर्जन बढी विषयको प्रशिक्षणमा सहभागी गराइनेछ । प्रतियोगितामा नेपालको आन्तरिक पर्यटनको विकासका लागि समेत विभिन्न गतिविधि सञ्चालन हुने आयोजक नेक्स्ट मोडल्स नेपालकी प्रबन्ध निर्देशक यत्ना पाण्डेले जानकारी दिइन् । युवाहरूको व्यक्तित्व विकास, आत्मविश्वास अभिवृद्धि, क्षमता उजागर लगायत नेतृत्वदायी क्षमता विकास गर्ने उद्देश्यले यो प्रतियोगिता २००१ देखि नियमित आयोजना हुँदै आएको हो । प्रतियोगिताको विगतका विजेताले विभिन्न अन्तर्राष्ट्रिय पुरस्कार समेत नेपाल भित्र्याउन सफल रहेका छन् । यस वर्षको प्रतियोगिता विगतको भन्दा भव्य हुने र त्यसको तयारीमा आफू जुटिसकेको आयोजक नेक्स्ट मोडल्स नेपालका सिइयो रवि धमलाले बताए ।