मिटरब्याज उजुरी लिन जिल्ला प्रशासनमा सहजीकरण डेस्क राखिँदै

चैत ६ गते। सरकारले मिटरब्याजसम्बन्धी उजुरी लिन जिल्ला प्रशासन कार्यालयमा सहजीकरण डेस्क स्थापना गर्ने भएको छ।

गृह मन्त्रालय र मिटरब्याज संघर्ष समितिबीच गत फागुन २८ मा भएको सहमतिअनुसार गृहले सहजीकरण डेस्क स्थापनाको काम अघि बढाउन ७७ वटै जिल्ला प्रशासनलाई निर्देशन दिएको हो।

‘मिटरब्याजसम्बन्धी उजुरी, निवेदन र पीडितका गुनासा तत्काल सुनुवाइ गर्न जिल्ला प्रशासन कार्यालयमा अधिकृत स्तरका कर्मचारीलाई जिम्मेवारी तोकी सोसम्बन्धी विषय हेर्ने सहजीकरण डेस्कसमेत स्थापना गर्न र डेस्कमा खटिने कर्मचारीको विवरण कार्यालयको वेबसाइटमा सार्वजनिक गर्न जिल्ला प्रशासन कार्यालयमा पठाइसकिएको छ’ , मन्त्रालयले जारी गरिएको विज्ञप्तिमा भनिएको छ। मिटरब्याजसम्बन्धी पीडितका गुनासो तत्काल सम्बोधन गर्ने विषयमा जिल्ला प्रशासन कार्यालय तथा अन्य निकायसँग समन्वय गर्ने गरी गृहमा शाखा अधिकृत चिरञ्जीवी जिएमलाई मन्त्रालयको सम्पर्क व्यक्ति तोकिएको प्रवक्ता नारायणप्रसाद भट्टराईले बताए।