काठमाडौं : अभिनेता सलोन बस्नेतले बाल कलाकारको रुपमा फिल्ममा अभिनय गर्दा अभिनेत्री केकी अधिकारी बाल्यकालकै अवस्थामा थिइन् । त्यसबेलाका सुपरस्टारहरुसँग सलोनले काम गरेका फिल्म उनले प्रायः हेरेकी छन् । उनको ‘चाइल्ड स्टार’ थिए, सलोन । उनलाई सलोनले बाल्यकालमा खेलेका फिल्महरु मात्र होइन, अभिनेता राजेश हमालसँग अन्तर्वार्ता दिँदाको अभिव्यक्ति समेत कन्ठस्थ छ ।
अहिले उनै सलोनसँग जोडी बाँधिएर केकीले फिल्म ‘जय हो’मा काम गरेकी छन्, जुन आगामी भदौ ८ गतेबाट प्रदर्शनमा आउँदैछ । उनीहरुको पहिलो पटक सहकार्य भएको हो । आफ्नो बाल्यकालको ‘चाइल्ड स्टार’सँग काम गर्न पाउनु केकीका लागि आफैंमा खुसीको क्षण थियो । सलोनसँग पहिलो पटक फिल्ममा सहकार्य भएता पनि त्यो महसुस भने कहिल्यै नभएको उनको अनुभव छ ।
उनी भन्छिन्, ‘एउटा राम्रो कलाकारसँग काम गर्दाको राम्रो पक्ष भनेको त्यसले तपाईंकै काममा निखारता ल्याउँछ । सलोनसँँग यही महसुस हुन्छ मलाई । कहिले पनि पहिलोचोटी काम गरेको जस्तो लागेन । फिल्ममा कति धेरै रोमान्टिक सिनहरु छन् तर अप्ठ्यारो महसुस भएन । हामी दुवैमा व्यावसायिकता भएर पनि होला । सधैं क्यारेक्टर र फिल्मको बारेमा नै सोच्ने हाम्रो स्वभाव पनि मिल्ने ।’
प्रायः फिल्ममा सहायक चरित्रमा सीमित सलोनलाई मुख्य नायकको रुपमा चल्न ‘जय हो’को सफलता अनिवार्य रहेको टिप्पणी हुँदै आएको छ । तर, केकी यसखालको मापदण्डमा कलाकारलाई पार्न नहुने तर्क राख्छिन् । एउटा राम्रो कलाकार दुई सिनकै लागि भए पनि इमानदारपूर्वक काम गर्नु नै रहेको उनको भनाई छ । सलोनले यसपटक पनि आफूलाई प्रमाणित गर्ने उनको विश्वास छ ।
कथा मिठो भएकाले ‘जय हो’मा आफू जोडिएको उनी बताउँछिन् । ट्रेलरमा कथालाई लुकाइएको उनको तर्क छ । ‘ट्रेलरमा हामीले जानीजानी नै कथालाई भनिएको छैन । कथा यति मिठो छ, जसले मलाई तान्यो । तर, ट्रेलरमा हामीले त्यसलाई देखाउन सकेनौं । फिल्म हेरेपछि दर्शकलाई ट्रेलरभन्दा धेरै माथि रहेछ भन्ने लाग्छ,’ उनले भनिन् । फिल्मलाई टेक पौखरी राईले निर्देशन गरेका हुन् ।
Discussion about this post