काठमाडौं/बैशाख ५ गते । नेपाल प्रहरीको साइबर ब्युरोले सामाजिक सञ्जालको प्रयोगमा विशेष सावधानी अपनाउन आग्रह गरेको छ । पछिल्लो समय फेसबुक म्यासेन्जर, ह्वाट्सएप, भाइबर, इमो आदिमा भिडियो कलमार्फत अपराधका घटना बढेको जनाउँदै ब्युरोले विशेष सावधानी अपनाउन आग्रह गरेको हो ।
केही समयदेखि सामाजिक सञ्जालका प्रयोकर्तालाई फ्रेन्ड रिक्वेस्ट पठाएर आफैँ भिडियो कल गरी अपरिचित व्यक्ति आफैँले अश्लील क्रियाकलाप देखाएर सम्बन्धित व्यक्तिलाई झुक्यानमा पार्ने गरेको देखिएको ब्युरोले जनाएको छ ।
“कल गर्ने व्यक्तिले अश्लील क्रियाकलापमा संलग्न हुने वातावरण बनाई उक्त भिडियो कलको रेकर्ड गर्ने गर्दछ । त्यसपछि साइबर अपराधमा फसाइदिन्छु, सामाजिक तथा पारिवारिक सम्बन्ध तहसनहस गराइदिन्छु भन्ने किसिमका धम्की दिई बारम्बार रकम माग गर्ने गरेका घटनाहरू पछिल्लो समय धेरै नै बढ्दै गइरहको देखिन्छ,” ब्युरोले भनेको छ ।
सामाजिक सञ्जाल प्रयोग गर्दा अवाञ्छित क्रियाकलापप्रति सहज रहन तथा अपरिचित आईडी वा ह्वाट्सएप, भाइबर लगायतका नम्बरबाट कुनै पनि कल आएमा यकिन गरी मात्र संवाद गर्न ब्युरोले गरेको छ ।
Discussion about this post