सप्तरी/चैत २१ गते । पार्टीका सप्तरी जिल्ला अध्यक्ष केदारप्रसाद यादवलाई कु टपिट गर्ने जिल्ला प्रहरी कार्यालय सप्तरीका प्रहरी निरीक्षक नवीन थापालाई बर्खास्त गर्न जनता समाजवादी नेपालले माग गरेको छ ।
जनताको काम लिएर प्रहरी कार्यालय पुगेका बेला अभद्र गाली गलौजसहित लात र मुक्काले निर्घात आ क्रमण गरि सख्त घाइते बनाउनुका साथै हथकडी लगाई थुन्ने प्रयास गरेको जसपाले जनाएको छ ।
मंगलबार जसपाका प्रवक्ता मनिष सुमनले एक विज्ञप्ति जारी गर्दै सप्तरीका प्रहरी निरीक्षक थापाद्वारा गरिएको निर्घात कु टपिट, आ क्रमण र अकारण थुन्ने प्रयासको निन्दा र भर्त्सना गर्दै दोषी प्रहरीलाई बर्खास्त गर्न माग गरेका छन् ।
प्रहरी कार्यालयमा स्थानीय स्तरमा घटेको घटनाबारे बुझ्न जाँदा प्रहरी निरीक्षक थापाले यादवलाई मरणासन्न हुने गरी कु टपिट गरेको जसपा मधेस प्रदेशका मुख्य सचिव दिनेश कुमार यादवले बताएका छन् ।
आँखानिर र टाउकोमा गम्भीर चोट लागेका नेता यादवको राजविराजस्थित गजेन्द्रनारायण सिंह अस्पतालमा उपचार भइरहेको महासचिव यादवले बताएका छन् ।
कु टपिटको विरोधमा जसपाका नेता, कार्यकर्ताहरु सप्तरीको सदरमुकाम राजविराजमा प्रहरीको विरोधमा उत्रिएका छन् । उनीहरूले जिल्ला प्रहरी कार्यालय सप्तरीको मूल गेटमा टायर बालेर प्रदर्शन गरेका छन् ।
यता जिल्ला प्रहरी कार्यालयका डिएसपी नरेशकुमार सिंहले अध्यक्ष यादव महदेवा गाउँपालिकाको मुद्दालाई लिएर प्रहरी कार्यालयमा जाँदा छलफलको क्रममा प्रहरी निरीक्षक थापासँग विवाद भएपछि अध्यक्ष यादवउपर हातपात भएको स्वीकार गरेका छन् ।
अध्यक्ष यादवले छलफलको क्रममा प्रहरी निरीक्षक थापालाई अपशब्द प्रयोग गरेपछि उनले हातपात गरेको डिएसपी सिंहको भनाई छ ।
यसअघि पनि जिल्ला प्रहरी कार्यालय सप्तरीका एकजना प्रहरी जवान रक्सी खाएर दिउँसै सडकमा हंगामा गरेपछि कारबाहीमा परेका थिए ।
Discussion about this post