महोत्तरी/असोज २५ गते। बडादशैँको पहिलो दिन घटस्थापनाको अवसरमा महोत्तरीको मटिहानीमा भव्य शान्ति कलश शोभायात्रा निकालिएको छ। धार्मिक झाँकी, बाजागाजा र हजारौँ श्रद्धालु भक्तजनको सहभागितामा निकालिएको शोभायात्राले मटिहानीलाई भक्तिमय बनाएको छ।
मटिहानीस्थित ऐतिहासिक दुर्गा मन्दिरको प्राङ्गणबाट सुरु भएको शोभायात्रा नगरका विभिन्न भागको परिक्रमा गर्दै पुनः मन्दिर परिसरमा पुगेर सम्पन्न भएको थियो। शोभायात्रामा सहभागी श्रद्धालुहरूले विश्व शान्ति, सामाजिक सद्भाव र समस्त मानव जातिको कल्याणको कामना गरेका थिए।
शोभायात्रा सम्पन्न भएपछि ऐतिहासिक दुर्गा मन्दिरमा विधिपूर्वक घटस्थापना गरी नवरात्रको पूजाआराधना सुरु गरिएको छ। नवरात्रको पहिलो दिनदेखि नै मन्दिरमा दर्शन तथा पूजाआजाका लागि आउने श्रद्धालुहरूको चहलपहल बढेको छ।
शान्ति कलश शोभायात्रामा मटिहानी नगरपालिकाका नगर प्रमुख हरिप्रसाद मण्डल, महोत्तरी जिल्लाका सुरक्षा निकायका प्रमुख तथा हजारौँ श्रद्धालु भक्तजनको सहभागिता रहेको थियो।
यसैबीच, बडादशैँको पहिलो दिन महोत्तरी जिल्लाका अन्य स्थानमा समेत दुर्गा पूजाको आरम्भ गरिएको छ। जलेश्वरस्थित महेन्द्र चोक र शंकर चोक, पिपरा गाउँपालिकाको पिपरा, महोत्तरी गाउँपालिकाको महोत्तरी र पर्सा तथा गौशाला नगरपालिकाको गौशालालगायतका स्थानमा दुर्गा प्रतिमा स्थापना गरी पूजाआराधना सुरु गरिएको हो।
नवरात्र सुरु भएसँगै जिल्लाका विभिन्न शक्तिपीठ तथा दुर्गा पूजा स्थलमा धार्मिक गतिविधि बढेका छन्। नौ दिनसम्म चल्ने दुर्गा पूजाले महोत्तरीका विभिन्न क्षेत्रलाई धार्मिक तथा सांस्कृतिक उत्सवमय बनाएको छ।
बडादशैँको अवसरमा आयोजना गरिने यस्ता धार्मिक कार्यक्रमले स्थानीय धार्मिक परम्पराको संरक्षणसँगै सामाजिक सद्भाव र सामूहिक एकताको सन्देश प्रवाह गर्ने विश्वास गरिएको छ।
Discussion about this post